Ibitero bibiri byabereye icyarimwe ku gisirikare cya Mali mu ijoro ryakeye byahitanye abasirikare ba leta batatu na batanu mu babigabye nkuko bitangazwa n'inzego z'umutekano muri icyo gihugu.
Byagabwe ku birindiro by'ingabo z'icyo gihugu biri hafi y'umupaka wacyo na Burkina Fasso. Ibyo birindiro byakunze kwibasirwa n'ibitero by'abarwanyi bagendera ku matwara ya cy'isilamu byatangiye mu majyaruguru ya Mali mu mwaka wa 2012.
Mu kwezi kwa cyenda umwaka wa 2019 ibi birindiro bya gisirikare na none byagabweho igitero n'abarwanyi bagendera ku matwara ya cy'Isilamu bahitana abasirikare 50 ba leta.
Umwe mu bashinzwe umutekano yavuze ko abandi basirikare barindwi bakomeretse hamwe n'abandi barwanyi b'Abajihadiste. Yavuze ko abagabye icyo gitero bataye moto 25 bahunga.
Ku wa kane abandi basirikare batatu ba leta baturikanywe n'igisasu mu karere ka Mondoro.