Lamine Diack yavukiye i Dakar mu 1933. Kuva mu 1999 kugera mu 2015, yabaye perezida w'urugaga mpuzamahanga rw'imikino ngororamubiri, WA mu magambo ahinnye y'Icyongereza, rufite icyicaro i Monaco mu Bufaransa.
Mu 2015, ubucamanza bw'Ubufaransa bwatangiye kumukurikirana, buza kumuhamya ibyaha bya ruswa mu kwezi kwa cyenda k'umwaka ushize w'2020. Bwamukatiye gufungwa imyaka ine, irimo ibiri y'insubikagihano, n'ihazabu n'amayero 500,000 (ni ukuvuga amadolari arenga 560,000).
Ntiyigeze afungwa kuko yajuriye. Ariko abacamanza bamutegetse gutanga agatabo ke k'inzira (pasiporo), aguma i Paris afungishijwe ijisho. Yabashije gusubira mu gihugu cye, Senegal, mu kwezi kwa gatanu gushize, amaze gutanga ingwate y'amayero 500,000. Yitabye Imana ataramenya itariki yari kuzaburana ubujurire bwe.
Urukiko rwa mbere rw'i Paris rwemeje ko Diack, akiri perezida wa WA yakiriye ruswa y'amadolari hafi miliyoni enye y'abakinnyi ngoraramubiri batandukanye bafataga imiti ibatera imbaraga kugirango abareke bikomereze amarushanwa.
Ubucamanza bw'Ubufaransa buvuga kandi ko Lamine Diack yafashe ruswa kugirango ahe umujyi wa Rio de Janeiro wo muri Bresil imikino olempike yo mu 2016, Tokyo mu Buyapani iyo mu mwaka ushize, no guha amarushanwa mpuzamahanga ibindi bihugu bitandukanye.
Umuryango we watangaje ko yazize urw'ikirago. Yari afite imyaka 88