Abasesengura ibya politike y'imibanire y'ibihugu baravuga ko uko Koreya ya Ruguru ikomeza gahunda yayo yo gucura intwaro yirengagije iby'ubutegetsi bwa Perezida Joe Biden w'Amerika buyisaba kujya mu biganiro, bigenda bikurura kutavuga rumwe hagati y'Amerika na Koreya y'Epfo ku byerekeye kuba Koreya ya Ruguru yakoroherezwa ibihano yafatiwe.
Ministri w'ububanyi n'amahanga wa Koreya y'Epfo, Chung Eui-yong, kuri uyu wa gatanu yavuze ko Amerika na Koreya y'Epfo bari bakwiriye korohereza Koreya ya Ruguru ibihano mu rwego rwo kuyishishikariza kwegera ameza y'ibiganiro.
Chung, witabiriye inama rusange y'Umuryango w'Abibumbye mu kwezi gushize ari kumwe na Perezida Moon Jae-in, yabwiye ikinyamakuru The Washington Post mu kiganiro bagiranye taliki 23 z'ukwa cyenda, ko biramutse bikomeje uko bimeze ubu byatuma Koreya ya Ruguru igwiza ubushobozi bwo gucura ibisasu bya rutura.
Chung Eui-yong yigeze kuba umujyanama wa Perezida Moon ku byerekeye umutekano w’igihugu anaba umuhuza hagati y'Amerika na Koreya ya Ruguru, agaragaza ubushake bwa perezida wa Koreya y'Epfo bwo Kubonana na Donald Trump wahoze ari Perezida w'Amerika.
Mu gusubiza amagambo ya Chung, ministeri y'ububanyi n'amahanga ya Leta zunze ubumwe z'Amerika ejo ku wa gatanu yashimangiye ko ibihano byafatiwe Korea ya Ruguru bigomba kugumaho.