Irani irashinja Israeli icyo yise "igitero cy'iterabwoba" ku ruganda rwayo rwa mbere rukomeye rw'ahitwa Natanz, hagati no hagati mu gihugu. Uruganda rwa Natanz rwamenyekanye bwa mbere mu 2002. Rufite ubuso bwa kilometerokare ibihumbi ijana. Rwubatse muri metero umunani ujya mu kuzimu. Kuva mu 2010, rufite ubushobozi bwo kuyungurura 'uranium' ku kigero cya 20%, nk'uko AIEA, ishami ry'Umuryango w'Abibumbye rishinzwe ibya 'nucleaire' ibivuga.
Ejo ku cyumweru, amashanyarazi yagize gutya arabura mu ruganda rwose. Hashize amasaha make mu mugoroba, umuyobozi w'ikigo cy'igihugu gishinzwe gahunda zacyo zose za 'nucleaire', Ali-Akbar Saléhi, yasohoye itangazo avuga ko bitari 'impanuka' ahubwo ari 'igitero cy'iterabwoba.'
Uyu munsi, umuvigizi wa minisiteri y'ububanyi n'amahanga, Saeed Khatibzadeh, yatangaje amakuru mashya, avuga ko imashini nyinshi ziyungurura 'uranium' zangiritse, yongeraho ko igitero cyakozwe na Israeli kandi ko Irani 'izihorera igihe n'aho izashakira'.
Ku bitangazamakuru binyuranye byo muri Israeli, Israeli koko yaba ifite uruhare ku ibura ry'amashanyarazi i Natanz. Bivuga ko yahabuze hakoreshejwe igitero cyo kuri 'Internet', 'cyber attaque' mu Gifaransa.
Byemeza ko uruganda rwangiritse ku buryo kurusana bishobora gufata amezi icyenda. Iki kibazo kibaye mu gihe Irani iri mu mishyikirano n'ibihugu by'ibihangange i Vienne muri Autriche kuri gahunda yayo ya 'nucleaire' n'ibihano bya Leta zunze ubumwe z'Amerika, no mu gihe minisitiri w'ingabo z'Amerika, Lloyd Austin, ari mu ruzinduko muri Israeli.
Si ubwa mbere kandi uruganda rwa Natanz ruhura n'impanuka. Mu 2009, rwangije cyane na virusi yo kuri 'Internet' yitwaga Stuxnet. Naho mu kwa kalindwi 2020, rwibasiwe n'inkongi y'umuriro.