Kuri uyu wa gatanu Ubwongereza bwafashe icyemezo cyo kubuza ingenzi ziturutse mu bihugu bitatu: U Rwanda, Uburundi na Emirates Zunze Ubumwe z’abarabu kwinjira muri icyo gihugu. Minisitiri ushinzwe ubwikorezi mu Bwongereza Grant Shapps abinyujije ku rukuta rwe rwa Twitter yavuze ko iki cyemezo kigamije guhagarika ikwirakwira ry’ubwoko bushya bwa Corona virus bwabonetse bwa mbere muri Afurika y'Epfo.
Leta y’u Rwanda iravuga ko nta bushakashatsi buremeza ko mu Rwanda haba harabonetse ubwo bwandu. Iki cyemezo kije nyuma yaho mu kwezi kwa 10 k’umwaka ushize ari bwo Kompanyi y’indega y’u Rwanda RwandAir yasubukuye ingendo zigana mu mugi wa Londres,i ngendo zikorwa kabiri mu cyumweru ku wa kabiri no ku wa gatandatu.
Icyo gihe ubwongereza bwari bwashyize u Rwanda mu bihugu abagenzi babiturukamo batagomba kubanza kujya mu kato k’iminsi 14 kubera icyorezo cya Virusi ya Corona. Icyemezo gishya gihagarika abagenzi bava mu Rwanda n’abanyura ku kibuga k’indege cya Kigali, kije gukoma mu nkokora bamwe mu batembereraga muri icyo gihugu.
Umwe mu bacuruza amatike y’indege mu gisagara ca Kigali yabwiye Ijwi ry'Amerika ko no kubusanzwe abagenzi bajya mu bwongereza basanzwe atari benshi, kuko kubona ibyangombwa by’icyo gihugu bigora. Gusa yasobanuyeko muri ibi bihe bya Guma mu rugo, n’ubundi abagenda bagabanutse, usibye abanyeshuri bajya kwiga mu bihugu byo hanze.
Mu karere ka Afurika y'Ubuseruko, ubwoko bushya bwa Coronavirus bumaze kuboneka muri Kenya gusa. Si igihugu cy’Ubwongereza gusa gifashe uyu mwanzuro, kuko n’ighugu cy’ubushinwa giherutse guhagarika indege y’u Rwanda yavaga Kigali ijya Guangzhou kubera ko hari abagenzi batanu basanzwemo Covid-19.
Ubushakashatsi bwakozwe n’ikigo cyo muri Austalia, bwashyize u Rwanda ku mwanya wa gatandatu ku isi n’amanota asaga 80 mu bihugu byagerageje guhangana n’icyorezo cya COVID19, ruba igihugu kimwe cya Afurika kije mu bihugu 10 bya mbere ku isi.
Ku wa kabiri w’iki cyumweru kigiye gutangira, hazaba hashize ibyumweru 2 umurwa mukuru Kigali uri mu bihe bya Guma mu rugo, mu cyemezo cyafashwe na Leta cyo gukomeza guhangana n’iki cyorezo.Gusa nubwo biri uko, muri iyi minsi umugi wa Kigali ukomeje kuba mu rugo, imibare y’abandura buri munsi nabo iki cyorezo gihitana igenda yiyongera.
Kugeza kuri uyu wa kane, Minisiteri y’Ubuzima yavugaga ko abantu 363 ari bo banduye Covid-19, naho 192 mu bari bayirwaye barakira. Abanduye bashya batumye kugeza ubu u Rwanda rubarura abagera 14,529, abamaze gukira ari 9234 naho abakirwaye bagera 5.109, mu gihe abo iyi ndwara imaze guhitana bagera 186 barimo batatu bitabye Imana ku munsi wa kane.
Your browser doesn’t support HTML5
Kuki Ubwonhereza Bwahagaritse Ingenzi Ziva mu Burundi no mu Rwanda?