Abaturage ntibakanzwe n'abasilikali benshi buzuye imihanda n'ibimodoka binini by'intambara. Bafunze amayira yose yerekeza kuri banki nkuru y'igihugu mu murwa mukuru w'ubucuruzi, Yangon, na gari ya moshi ziva muri uyu mujyi zijya mu wundi witwa Mawlamyine, uri mu majyepfo ya Myanmar.
Abamonaki benshi b'Ababudista, idini ryiganje muri Myanmar, nabo bari kumwe n'abaturage mu myigaragambyo i Yangon.
Hagati aho, Internet yiriwe ifunze muri Myanmar. Naho umukuru w'igihugu, Aung San Suu Kyi, ugifungiye iwe mu icumbi rye ry'akazi, uyu munsi yagombaga kwitaba urukiko, rukoresheje ikoranabuhanga rya videwo. Abavoka be batangaje ko ubushinjacyaha bwamushyizeho ikirego cya kabili, cyo kurenga ku mategeko agenga ibihe by'ibiza. Mu kirego cya mbere ho ashinjwa kurenga ku mategeko agenga ubucuruzi bw'ibyinjira n'ibisohoka.
Ba ambasaderi bahagarariye Leta zunze ubumwe z'Amerika, Canada n'ibindi bihugu 12 byo mu Muryango w'Ubumwe bw'Ubulayi muri Myanmar bashyize hanze itangazo rimwe bose bashyizeho umukono bavuga ko bashyikiye abaturage. Bati: "Isi yose irareba."