Perezida ucyuye igihe, Roch Marc Kaboré, ushaka manda ya kabiri y'imyaka itanu, yiyamamaje ashishikariza abatutage gutsinda ubwoba bakajya gutora.
Nyamara abaturage b'imidugudu amagana, bari hagati y'ibihumbi 300 na 400, ni ukuvuga byibura 7% by'abagejeje ku myaka yo gutora bose, ntibashoboye gutora kubera umutekano muke, cyane cyane mu majyaruguru y'igihugu.
Muri uyu mwaka, abaturage barenga ibihumbi bibiri bapfiriye mu bitero by'iterabwoba by'Umutwe wa Leta ya Kislamu na Al-Qaïda. Abandi baturage barenga miliyoni imwe bavuye mu byabo kubera ibi bitero.
Usibye Perezida Roch Marc Kaboré, abandi bakandida 12 biyamamarije umwanya w'umukuru w'igihugu. Nihabura uwegukana amajwi arenze 50%, hazaba icyiciro cya kabiri cy'itora hagati ya babiri ba mbere.
Indorerezi z'Afrika yunze ubumwe muri aya matora yo muri Burkina Faso ziyobowe na Bernard Makuza, wahoze ari perezida wa Sena na minisitiri w'intebe w'u Rwanda.