Ubufaransa, Ubudage n'Ubutaliyani byaraye byongeye gukoresha urukingo rwa Covid 19 rwakozwe n'ikigo AstraZeneca, nyuma y'aho impuguke z'abaganga zigeragereje kumara abantu impungenge ko rushobora gutera amaraso kuvura.
Ibihugu by'Ubulayi byasubukuye itangwa ry'inkingo nyuma y'uko ikigo gishinzwe kugenzura iby'ubuvuzi mu Bulayi - European Medicines Agency (EMA), gitangarije ko urukingo ikigo AstraZeneca gifatanyije na Kaminuza ya Oxford nta kibazo ruteye kandi rukora koko; n'Ishami ry'Umuryango w'Abibumbye ryita ku buzima – OMS ryatangaje ko amakuru agaragara nta na hamwe yerekana ko rutera amaraso kuvura ku bantu baruhawe.
Gusa, ministri w'ubuzima mu Bufaransa, Olivier Veran yavuze ko akanama njyanama k'igihugu cye katanze amabwiriza ko urukingo rwa AstraZeneca ruhabwa abantu bafite imyaka 55 kuzamura.
Abakozi ba leta y'Ubufaransa bavugaga ko bashingiye ku byavuzwe n'ikigo gishinzwe kugenzura iby'ubuvuzi mu Bulayi -EMA, badashobora gukuraho burundu impungenge ko hari abantu bake mu baruhabwa rushobora gutera amaraso kuvura, cyane cyane mu bakobwa bakiri bato. Ikigo EMA cyatangaje ko muri rusange inyungu zo guhaba urwo rukingo zisumba iz'ibibazo rushobora gutera.
Ishami ry'Umuryango w'Abibumbye ryita ku Buzima - OMS, ejo ku wa gatanu ryongeye gusaba ko ibihugu binyuranye byo hirya no hino ku isi bikomeza gukoresha inkingo zakozwe n'ikigo AstraZeneca.
Akanama k'impuguke z'ishami ry'Umuryango w'Abibumbye ryita ku buzima OMS katangaje ko urukingo rw'ikigo AstraZeneca "rushobora kugabanya cyane abandura no kugabanya umubare w'abapfa".
Mu rwego rwo gushishikariza rubanda gutinyuka urwo rukingo, Ministri w'Intebe w'Ubufaransa, Jean Castex, yahawe urukingo rwakozwe n'ikigo AstraZeneca ejo ku wa gatanu avuga ko icyo gikorwa kigaragaza ko arufitiye "icyizere cyuzuye".