Ministiri w'ububanyi n'amahanga wa Djibouti yamaganye ibyo yise amakuru y'ibihuha akomeje gukwirakwiza ku mbuga nkoranyambaga avuga ko umukuru w'igihugu yaba arembeye mu bitaro mu Bufaransa.
Ku rubuga rwa Twitter ministiri Mahmoud Ali Youssouf yavuze ko gukwirakwiza icyo yise uburozi, bigamije guhungabanya igihugu. Yanditse ko umukuru w’igihugu yafashe iminsi mike y’akaruhuko nyuma y’umunaniro utewe n’akazi kenshi amaze mo iminsi.
President Ismail Omar Guelleh is fine . All informations circulating about his health situation is far from the reality . His is having a few days off and undergoing medical check up due to lack of rest for he did not leave the country during the whole summer
— Mahmoud Ali youssouf (@ymahmoudali) September 14, 2021
Perezida Ismail Omar Guelleh w’imyaka 73 mu kwezi kwa kane yatorewe indi manda ya gatanu yo kuyobora igihugu. Ategetse Djibouti kuva mu 1999.
Nyuma gato y’amakuru yakwirakwijwe ku mbuga avuga ko umukuru w’igihugu ashobora kuba yagiye kwivuza mu Bufaransa, ministiri w’ububanyi n’amahanga yahise anyomoza ayo makuru ku rubuga rwa twitter, avuga ko agamije kuroga abaturage.
Yemeye ko umukuru w’igihugu ari mu rugendo hanze. Avuga ko uru rugendo rwari rumaze igihe rwarateguwe. Yongeyeho ko minsi mike, azaba yagarutse mu gihugu.
Igihugu cya Djibouti giherereye ku nyanja y’Arabiya kirimo ibirindiro bya gisirikali by’ibihugu bikomeye ku isi nka Leta zunze ubumwe z’Amerika, Ubufaransa, Ubuyapani n’Ubushinwa.
Mu bihe bitandukanye ubutegetsi bwa perezida Guelleh bwagiye bushinjwa kutorohera abatavuga rumwe nawe no kuniga ubwisanzure bwo gutanga ibitekerezo.