Inzego zishinzwe iby'ubuzima muri Ghana zavuze ko iki gihugu kizakingira COVID-19 abantu bafite ubwenegihugu n’abagituye, bakigera ku kibuga cy’indege guhera kuwa mbere w’icyumweru gitaha, igihe bazaba batarafashe urukingo mbere.
Abaturage bose basohoka mu gihugu na bo bazasabwa kwerekana icyemezo cy’uko bakingiwe, nk’uko umuyobozi mukuru wa serivizi z’ubuzima, Patrick Kuma-Aboagye yabivuze mw’itangazo, avuga ko impamvu ari uko abarwayi ba COVID-19 biyongereye kandi hakaba harabonetse n’ubwandu bushya bwa virusi, Omicron.
Ghana kugeza ubu yamaze guha inkingo abaturage bayo bagera kuri 5.7 ku ijana bya miliyoni 30. Byerekanwa n’imibare yakusanyijwe n’ibiro ntaramakuru byo mu Bwongereza, Reuters.
Ibisabwa bishya biherutse gutangazwa, ni byo bikaze kurusha ibindi muri Afurika, aho ibikorwa by’ikingira byagenze buhoro biturutse ku kutagira inkingo zihagije hiyongeyeho ibibazo by’ibikoresho n’uburyo.
Kuma-Aboagye, mu itangazo ryasohotse mw’ijoro ry’ejo ku wa kane, yagize ati: “Umubare w’abantu bandura, hiyongeyeho abasanganwa virusi y’ubwoko bushya, Omicron, mu bagera ku kibuga cy’indege kandi byitezwe ko baziyongera mu bihe by’iminsi mikuru, birasaba igikorwa cyihuse cyo gukumira ubwandu bukomeye bwa COVID-19 muri Ghana”.
Ghana izashyira ingufu mu bikorwa by’ikingira muri uku kwezi kandi guhera kw’italiki ya 22 y’ukwezi kwa mbere gutaha, urukingo ruzaba itegeko ku byiciro byagenwe harimo abakozi ba Leta, abakozi bo mu buvuzi hamwe n’abanyeshuri.
Guhera mu kwezi kwa mbere, icyemezo cy’uko umuntu yakingiwe, kizanakenerwa kugira ngo umuntu yemererwe kwinjira mu tubari, mu mazu afatirwamo amafunguro, muri sitade z’imikino n'ahandi hahurira abantu benshi.
Umuyobozi mukuru ushinzwe ubuzima, yavuze ko mu byumweru bibiri bishize, abantu babaruwe barwaye COVID-19 ku kibuga cy’indege mpuzamahanga cya Accra, bari bagize hafi 60 ku ijana by’umubare w’abanduye bose mu gihugu.
Yongeraho ko imibare yavuye ku kibuga cy’indege yerekanye ko abantu babonetseho virusi ya corona, abakubye incuro eshatu bashobora kuba ari abatari bakirakingiwe. Muiri 34 basanganywe ubwoko bushya, Omicron, 75 kw’ijana bari batarahabwa urukingo.
Reuters