Amerika Yahaye u Rwanda Imashini Zifasha mu Kuvura Covid19

Igihugu cy’Amerika cyashyikirije Leta y’u Rwanda imashini 100 zifashishwa mu kuvura abarwayi barembejwe na Covid-19.

Izi mashini zatanzwe na Ambasaderi w’Amerika mu Rwanda, azishyikiriza Ministre w’ubuzima w’u Rwanda. Itangazo ryahawe abanyamakuru rivuye muri Ambasade y’Amerika mu Rwanda, rigaragaza ko iyi nkunga y'Amerika igamije gufasha u Rwanda muri gahunda yo guhangana n’iki cyorezo.

Nk'uko byasobanuwe na Ambasaderi wa Leta z’unze ubumwe z’Amerika mu Rwanda, Peter Vrooman yavuze ko izi mashini zakorewe muri Leta zunze ubumwe z’Amerika ziri mu zisanzwe zifasha guhumeka abarwayi bajahajwe na Covid-19, guhumeka.

Leta y’u Rwanda ivuga ko yari isanzwe ifite izindi mashini zifasha abarembejwe na Covid -19. Minisitiri w’ubuzima mu Rwanda Daniel Ngamije, yemeza ko izi mashini zije ziyongera ku zindi 86 Leta yaguze, kandi ko zizifashishwa mu zindi ndwara.

Izi mashini zatashwe zifite agaciro ka Miliyari mu mafaranga y’u Rwanda. Iyi nkunga ije ikurikira izimaze gutangwa n’igihugu cy'Amerika zingana na Miliyari 10 muri ibi bihe byo guhangana na Covid-19.

Inkuru yateguwe n'umunyamakuru w'Ijwi ry'Amerika mu Rwanda Assumpta Kaboyi.

COVID-19: Amerika Yahaye u Rwanda Imashini Zifasha Kuvura Indembe