Bosco Ntaganda Arahamwa n’Ibyaha Byose 18 Yari Akurikiranyweho

Urukiko mpuzamahanga rw’i La Haye mu Buholandi rwemeje ko Bosco Ntaganda ahamwa n’ibyaha byose 18 yari akukiranyweho.

Muri ibyo byaha harimo kwinjiza abana batarageza ku myaka 15 mu gisirikare, gufata abagore ku ngufu, ubwicanyi bwibasiye abasivili, no gusahura imitungo y’abandi.

Umucamaza Robert Fremr yamubwiye ko hari ibyaha yakoze ku giti cye kandi ko hari n’ibindi yafatanije n’abandi.

Bosco Ntaganda amaze gusomerwa, umucamanza yamubwiye ko afite uburenganzira bwo kuzana ibindi bimenyetso yumva byamurenganura, kandi ko ashobora kujurira mu gihe cyitarenze iminsi 30.

Urukiko ruzamukatira mu gihe kiri imbere cyitaratangazwa.

Bosco Ntaganda yari yungirije umuyobozi w’ingabo z’umutwe wa FPLC (les Forces patriotiques pour la libération du Congo) washakaga kwigarurira akarere ka Ituri. Abo mu bwoko bw‘AbaLendu n’AbaNande ngo bakaba ari bo bibasiwe cyane n’ubwicanyi.

Bosco Ntaganda yavukiye mu Rwanda muri 1973. Yinjiye mu ngabo za FPR afite inyaka 17, kuva icyo gihe kugeza muri 2013 yari umusirikare arwanira mu mutwe wa M23 yari yaragiyemo asezeye mu ngabo za Kongo.

Bosco Ntaganda, batazira Terminator, arubatse, afite umugore n’abana barindwi.

Inkuru y'umunyamakuru w'Ijwi ry'Amerika i Londres mu Bwongereza, Venuste Nshimiyimana.

Bosco Ntaganda Arahamwa n’Ibyaha Byose