Komisiyo y'igihugu y'amatora imaze gutangaza amajwi y'agateganyo yo mu ntara 11 kuri 16 zigize igihugu. Perezida Nana Akufo-Addo, ushaka manda ya kabiri y'imyaka itanu, ni we uza imbere gato y'uwo bahanganye, John Mahama w'ishyaka NDC.
Abayoboke b'ishyaka NPP rya Perezida Akufo-Addo batangiye guteranira imbere y'aho atuye, biteguye kubyina intsinzi. Abayoboke b'ishyaka NDC nabo batangiye guteranira imbere y'ibiro bya Komisiyo y'igihugu y'amatora, baririmba babyina.
Ejo ku mugoroba, John Mahama asa n'ushaka gusesa amasezerano yasinyanye na Perezida Akufo-Addo, bombi barahirira ko bazemera ibizava mu matora nta mananiza, kandi ko bazirinda kubiba urugomo mu bayoboke babo. None Mahama yaravuze ngo "azarwanya ibikorwa byose bigamije kumwiba itora."
Polisi ya Ghana yatangaje uyu munsi ko yabaruye imvururu 60 zishamikiye ku matora kuva ku munsi w'itora ejobundi kuwa mbere. Esheshatu muri zo zavuzemo n'amasasu, yishe abantu batanu.
Uretse ibyo ariko, indorerezi mpuzamahanga zemeza ko amatora yabaye mw'ituze muri rusange, ugereranyije no mu bindi bihugu byo muri Afrika y'uburengerazuba, Guinea na Cote d'Ivoire, nabyo bivuye mu matora yamenetsemo amaraso.
Uretse amatora y'umukuru w'igihugu, abaturage ba Ghana batoye kandi icyarimwe kuwa mbere n'inteko ishinga amategeko. Ibyavuye muri aya matora bishobora kumenyekana ejo kuwa kane.