Umukuru wa Leta ya gisirikare muri Myanmar Min Aung Hlaing kuri uyu wa gatandatu yatangaje ko Aung San Suu Kyi wahiritswe ku butegetsi muri icyo gihugu ameze neza kandi azitaba urukiko mu minsi iri imbere.
Suu Kyi araregwa ibyaha birimo gutunga radio zikoreshwa mu itumanaho mu buryo bunyuranyije n'amategeko, kwica amategeko agenga itumanaho mu gihugu, kurenga ku mabwiriza yo kwirinda Covid 19, no gushishikariza rubanda guteza imvururu. Ubutegetsi bwa gisirikare kandi bumurega kwakira amadolari y'Amerika 600,000 mu buryo butemewe n'amategeko.
Ihirikwa ry'ubutegetsi muri iki gihugu cyo mu burasirazuba bushyira amajyepfo y'Aziya ryateye imyigaragambyo ikaze yo kwamagana leta ya gisirikare. Byateye kandi imvururu no gushyamirana hagati y'imitwe y'abitwaje intwaro gakondo n'igisirikare kiri ku butegetsi.
Umwe muri iyo mitwe uzwi ku izina rya Kachin Independence Army (KIA) kuri uyu wa gatandatu wagabye igitero ku gisirikare mu ntara ya Sagaing nkuko byemezwa n'itangazamakuru ryo muri icyo gihugu.
Umuvugizi w'uwo mutwe wa KIA yabyemereye ibiro ntaramakuru by'Abongereza – Reuters ariko nta byinshi yatangaje byerekeye icyo gitero.
Abakuriye ubutegetsi bwa gisirikare muri Myanmar bagerageza gusobanura ko impamvu yabateye guhirika ubutegetsi, ar'uko amatora y'italiki 8 z'ukwezu kwa cumi na kumwe umwaka ushize yabaye muri icyo gihugu yakozwe mu buryo bufifitse. Ariko komisiyo y'igihugu ishinzwe amatora muri Myanmar, irabihakana.