Leta zunze ubumwe z'Amerika yafunguye imipaka yayo yari imaze hafi imyaka ibiri ifunze kubera icyorezo cya virusi ya Corona. Nk'uko ibigo ntaramakuru bitandukanye bibitangaza, abantu ibihumbi n'ibihumbi bo ku isi bazindutse bajya gufata indege ziza muri Leta zunze ubumwe z'Amerika.
Leta zunze ubumwe z'Amerika, igihugu cya mbere ku isi cyakira indege nyinshi kurusha amahanga yose, yatangiye gufunga imipaka yayo yo mu kirere, ku butaka no ku nyanja mu kwezi kwa mbere k'umwaka ushize. Byatanyije imiryango itabarika. Ubucuruzi n'ubukerarugendo byarahombye.
Urugero rw'ukuntu abantu bari barahangayitse: sosiyete y'indege yo mu Bwongereza British Airways ivuga ko abantu bashaka kuza muri Amerika mbere ya Noheli baguze amatike biyongereye inshuro 900%. Sosiyete yo muri Amerika yitwa American Airlines yo ivuga ko abashaka kuva muri Amerika bajya mu Bwongereza biyongere inshuro 66%, abajya mu Bulayi 40%, naho abajya muri Bresil 74%.
Izindi sosiyete z'indege nyinshi nazo zari zariteguye: zongereye umubare w'indege, zahisemo indege nini, zashastse n'abakozi b'inyongera. Imipaka ifunguriwe ibihugu 33. Abinjira bagomba kugira ikimenyetso ko bikingije, no kwipimishisha bakerekana ko batanduye Covid-19 iminsi itatu mbere yo gufata indege. Leta zunze ubumwe z'Amerika ivuga kandi ko yemerera kwinjira abafashe inkingo yo ubwayo yemera n'izemewe na OMS (ishami ry'Umuryango w'Abibumbye ryita ku buzima). Bivuze ko abantu amamiliyoni bo ku isi yose batemewe niba barikingije, tuvuge, na za Sputnik V yo mu Burusiya cyangwa CanSino yo mu Bushinwa.