Perezida Joe Biden uyu munsi arasubizaho ingamba zo kubuza abanyamahanga kwinjira muri Leta zunze ubumwe z'Amerika bava mu bihugu byinshi birimo Covid cyane.
Icyemezo cya perezida wa Leta zunze ubumwe z'Amerika kirareba abaturage b'Afrika y'Epfo, Brésil, Irlande, Ubwongereza, n'ibihugu 26 byo ku mugabane w'Ubulayi. Ariko ntikireba abanyamahanga bafite uburenganzira buhoraho bwo gutura no gukora muri Leta zunze ubumwe z'Amerika.
Afrika y'Epfo iri kuri uru rutonde by'umwihariko kubera ubundi bwoko bwa virusi ya Corona bwahagaragaye, bwandura kandi bwica vuba kurusha virusi yari isanzwe izwi. Umuyobozi w'ikigo cya Leta zunze ubumwe z'Amerika gishinzwe kurwanya indwara zandura, Dr. Anthony Fauci, yatangaje ko iyi virusi, bita "iyo muri Afrika y'Epfo," ibahangayikishije cyane. Ati: "Turayikurikirira bugufi, n'ubwo bwose batarayibona muri Amerika."Ubundi bwoko bwa Covid bwo mu Bwongereza bwo bwageze muri Amerika.
Icyemezo cya Perezida Biden gikuyeho icyo uwo yasimbuye, Donald Trump, yasizeho, cyavugaga ko abanyamahanga bose bashobora kwinjira muri Leta zunze ubumwe z'Amerika ariko bakabanza kwerekana ko batanduye virusi ya Corona iminsi itatu mbere yo kuhaza.