Leta zunze ubumwe z'Amerika n'inshuti zayo bararega Ubushinwa ibitero bikomeye byo ku ikoranabuhanga, "cyber hacking" mu Cyongereza.
Amerika ifatanyije n'ibindi bihugu bitanu, ari byo Ubwongereza, Canada, Australia, Nouvelle-Zelande, n'Ubuyapani, n'imiryango mpuzamahanga ibiri, Umuryango w'Ubumwe bw'Ubulayi, na Otan (Umuryango wa gisilikali w'ubutabarane hagati y'ibihugu bituriye amajyaruguru y'inyanja y'Atlantika).
Hari hashize kandi ukwezi, abayobozi b'ibihugu birindwi bya mbere bikize ku isi (ari byo Leta zunze ubumwe z'Amerika, Canada, Ubwongereza, Ubufaransa, Ubutaliyani, n'Ubuyapani) n'ab'ibindi bihugu 29 bya Otan bumvikanye na Perezida Joe Biden ko bagomba gutangaza ko Ubushinwa bubangamiye imibereho y'isi.
Ubusanzwe, Leta zunze ubumwe z'Amerika yari ikunze kurega Uburusiya ibitero byo ku ikoranabuhanga. Ni ubwa mbere ivuze n'Ubushinwa ku mugaragaro. Yo n'inshuti zayo bavuga ko guverinoma y'Ubushinwa yibasira inzego za leta n'ibya gisilikali, imitwe ya politiki, inganda, no kwiba umutungo bwite mu by’ubwenge (propriété intelletuelle mu Gifaransa).