Abadepite Bagejeje Kuri Sena Ikirego Cyabo Kuri Donald Trump.
Uyu munsi, abasenateri barakora indahiro yo kuba abacamanza n'abaturage bagize urukiko rwa rubanda bita jury mu Cyongereza. Ariko ntibahita batangira kuburanisha ikirego. Bafashe icyemezo cyo kurindira kugera ku itariki ya 9 y'ukwezi kwa kabiri gutaha, kugirango bahe abavoka bigenga ba Trump n'abadepite bazaba abashinjacyaha igihe gihagije cyo kwitegura.
Sena kandi izakoresha iyi minsi ibanziriza urubanza kugirango ibanze irangize imirimo yo kwemeza abategetsi bazafasha Perezida Joe Biden kuyobora igihugu.
Aba badepite b'abashinjacyaha ni icyenda. Bakuriwe n'umunyamategeko Jamie Raskin, umwe mu bahagarariye leta ya Maryland mu nteko ishinga amategeko ya Leta zunze ubumwe z'Amerika. Batandukanye n'ababuraniye Umutwe w'Abadepite mu rubanza rwa mbere baburanye na Trump muri Sena umwaka ushize.
Trump nawe yahaye akazi ko kumuburanira abavoka batandukanye n'aba mbere. Abo muri uru rubanza rwa kabiri bazaba bayobowe n'umunyamategeko Butch Bowers, wazobereye mu by'amategeko arebana n'amatora, n'umutegarugoli Deborah Barbier, wigeze kuba umushinjacyaha wo ku rwego rw'igihugu kandi wazobereye mu by'amategeko arebana n'ibya ruswa n'ibindi byaha byo mu rwego rw'imari.
Ikindi na none gitandukanye n'urubanza rwa mbere, rwayobowe na perezida w'urukiko rw'ikirenga, John Roberts. Uru rwa kabiri rwo ruzayoborwa na perezida w’umusimbura (pro-tempore) wa Sena. Uyu ni Senateri Patrick Leahy wo mu ishyaka ry'Abademokarate, kubera ko Trump atakiri ku butegetsi.
Trump aregwa icyaha cyo gushishikariza rubanda kwigomeka ku nzego z'ubutegetsi, igihe abayoboke be bagabaga igitero ku ngoro y'inteko ishinga amategeko, ku itariki ya 6 y'uku kwezi kwa mbere. Igitero cyaguyemo abantu batandatu.