Umugabo w'imyaka 51 yaraye arasiwe hafi y'ingoro Perezida w'Amerika Donald Trump akoreramo nyuma yo kwiruka asatira abarinda umutekano w'umukuru w'igihugu.
Abarinda umutekano wa Perezida Donald Trump wa Leta zunze ubumwe z'Amerika baraye bamukuye ikitaraganya mu kiganiro yagiranaga n'abanyamakuru ku ngoro akoreramo ya White House, hamaze kumvikana urusaku rw'amasasu ku nyubako iri hafi ya Prezidansi y'Amerika. Agarutse ku gituti yavugiragaho nyuma y'iminota micye Perezida Trump yemeje ko hari umuntu umaze kuraswa kandi yajyanywe ku bitaro.
Tom Sullivan ukuriye ishami ry'ingabo zampara impuzankano ya gisirikare mu barinda abayobozi b'igihugu n'imiryango yabo, yavuze ko uwo mugabo w'imyaka 51 yari afite intwaro. Yaje yiruka asatira umwe mu barinda perezida n'ingoro akoreramo, akora mu myenda ye nk'ushaka gukura intwaro, uwo musirikare wari wamaze kwitegura amurasa amasasu abiri.
Tom Sullivan nta bibazo by'abanyamakuru yigeze asubiza. Abo bombi bajyanywe kwa muganga ariko nti byatangajwe niba koko uwo warashwe yari yitwaje intwaro. Perezida Trump yabwiye abanyamakuru ko atazi niba uko kurasa hari aho bihuriye na we ubwe.