Afurika y’epfo, ifite intego yo gukingira miliyoni eshanu z’abaturage bayo bafite hejuru y’imyaka 60 mu cyiciro cya kabiri cy’itangwa ry’urukingo rwa COVID-19, mbere y'impera z'ukwezi gutaha kwa gatandatu.
Byavuzwe na minisitiri w’ubuzima. Icyo cyiciro cya kabiri cyatangiye uyu munsi kuwa mbere. Minisitiri Zweli Mkhize, yaraye atangaje ko iryo kingira rizashoboka bitewe n’uko bazaba babonye inkingo miliyoni enye n’igice za Pfizer na miliyoni ebyiri za Johnson & Johnson mu mpera z’ukwezi kwa Gatandatu.
Minisitiri Mkhize yavugaga ko inkingo 325,000 za Pfizer zari buhagere mw’ijoro ryakeye, bigatuma inkingo zigera ku 975,780. Kugeza ubu Afurika y’epfo, yatumije inkingo za COVID-19 zihagije, ku baturage miliyoni 46 muri miliyoni 60 zituye igihugu.
Minisitiri w’ubuzima yavuze ko igihugu gitegereje ko urukingo rwa Johnson & Johnson rurekurwa n’ikigo cy’Amerika gishinzwe ibiribwa n’imiti (FDA) nyuma y’uko ubuyobozi bwacyo bubaye buruhagaritse, hanyuma rukongera rukasubizwaho mu byumweru bibiri byakurikiyeho. Byari byaturutse ku mpungenge z’uko haba ukuvura kw’amaraso ku muntu waruhawe.
Afurika y’epfo ni cyo gihugu cyazahaye mu bijyanye n’ubwandu n’impfu z’abantu 55,000 n’abarenga miliyoni imwe n’ibihumbi magana atandatu banduye COVID-19.
Hari ubwoba bw’inkubiri ya gatatu, y’icyorezo cya virusi ya corona, bwaturutse muri ibi byumweru bishize, nyuma yo kubona ubwoko bubiri bushya bw’iyo virusi mu gihugu buturutse mu Buhinde no mu Bwongereza, ari nako ibikorwa by’ikingira byagendaga buhogo.
Minisitiri w’ubuzima yavuze ko abakozi bo mu buvuzi bari hafi kugera ku 480,000 bakingiwe mu cyiciro cya mbere, muri miliyoni 1 n’ibihumbi magana abiri bafitwe mu ntego yo guhabwa urukingo.