Abadipolomate 15 hamwe n’uhagarariye umuryango wa OTAN muri Afuganistani basabye Abatalibani guhagarika ibitero byabo bya gisilikare, amasaha make nyuma y’uko inyeshyamba na guverinema y’Afuganistani bananiwe kwumvikana kw’ihagarikwa ry’imirwano mu biganiro barimo i Doha muri Qatar.
Intumwa z’Afuganistani zabonanye n’abayobozi b’abanyepolitiki b’Abatalibani mu murwa mukuru wa Qatar mu mpera z’icyumweru. Cyakora itangazo ryo mw’ijoro ry’ejo ku cyumweru rivuga ko Abatalibani ntacyo bavuze kw’ihagarikwa ry’urugomo rufata intera muri Afuganistani.
Iryo tangazo ry’abadipolomate 15 n’abahagarariye OTAN, rigira riti: “Iyi ni Eid al-Adha, abatalibani bakwiye gushyira intwaro zabo hasi burundu kandi bakereka amahanga ubwitange bwabo mu nzira y’amahoro”. Babihuzaga n’umunsi w’ikiruhuko w’Abayisilamu muri Afuganistani w’ejo kuwa kabiri
Iryo tangazo rishyigikiwe na Ostraliya, Canada, Repurika ya Czech, Denmark, intumwa z’umuryango w’ubumwe bw’Ubulayi, Finlande, Ubufaransa, Ubudage, Ubutaliyani, Ubuyapani, Koreya, Ubuholandi, Esipanye, Suede, Ubwongereza na Leta zunze ubumwe z’Amerika hamwe n’umuyobozi mukuru wa gisivili w’Umuryango wa OTAN.
Imirwano yari ikirimo kuba uyu munsi kuwa mbere mu ntara yo mu majyaruguru ya Samangan. Abashinzwe umutekano babashije kwambura inyeshyamba intara ya Dar-e-Sof Bala. Byavuze n’igisilikare kiri mu karere. Cyongeyeho ko abarwanyi b’Abatalibani 24, bishwe hamwe n’uwitwaga ko ari guverineri w’intara n’abakomanda babiri.