Polisi yaraye yishe umusore w'Umwirabura w'imyaka 18 y'amavuko witwa Deon Kay, mu murwa mukuru Washington D.C. Abapolisi bavuga ko bamurashe kubera ko yari abatunze imbunda ya masotera.
Ariko ku muryango Black Lives Matter (BLM mu magambo ahinnye), bivuze ngo ubuzima bw'Abirabura bufite agaciro, "aba bapolisi ntibagomba kubuca ngo babutware, bakwiye kubiryozwa."
BLM irahamagarira abaturage gukora imyigaragambyo ari benshi aho uwo musore yiciwe. Imyigaragambyo ya mbere yaraye ihuruje abantu amagana imbere ya sitasiyo ya polisi imwe.
Naho abapolisi barashe Deon Kay babaye bahagaritswe ku kazi by'agateganyo. Hashize iminsi ibiri undi mwirabura witembereraga ku igare yishwe na polisi mu mujyi wa Los Angeles, muri leta ya California, mu burengerazuba bwa Leta zunze ubumwe z'Amerika.
Ejo kuwa gatatu kandi, umuryango w'undi Mwirabura witwa Daniel Prude, watangaje urupfu rwe rutari rwaravuzwe. Nawe yishwe anizwe na polisi mu kwezi kwa gatatu gushize, kandi yari mu mapingu yambaye n'ubusa, mu mujyi wa Rochester muri Leta ya New York, mu burasirazuba bw'igihugu.
Imfu z'Abirabura bazira abapolisi zateye imyigaragambyo y'akataraboneka, imaze amezi mu gihugu cyose cya Leta zunze ubumwe z'Amerika.