Abashakashatsi hirya no hino ku isi barasibanira gushakisha urukingo rushobora guhosha ubukana bw'ikiza cya Covid 19. Bararwana no kugabanya igihe kibarirwa mu myaka ubushakashatsi nk'ubwo busanzwe bumara ngo barebe ko babikora mu mezi.
Inkingo zirenga 180 ziri mu igeragezwa; 20 muri zo zirageragerezwa ku bantu. Ubushakashatsi buri ku isonga bwiganje muri Amerika n'Ubulayi aho ibihugu bimwe biteganya kuzaba byemeje urwo rukingo mu mpera z'uyu mwaka.
Tayilande iri mu bihugu bike bikiri mu nzira y'amajyambere bigerageza ubwo bushakashatsi. Ubwo ibicurane bikomoka ku ngurube byadukaga mu 2009, igihugu cya Tayilande cyapfushije abantu barenga 300 mu 47,000 bari babyanduye. Icyo gihe, igihugu cyaguze inkingo zigera kuri miliyoni 2 ariko zijya kuhagera icyo cyorezo cyamaze kurangira.
Tayilande ivuga ko ibyo byayibereye isomo none ubu yashyize imbere ubushakashatsi gakondo. Kaminuza ya Chulalongkorn ikorerwamo ubushakashatsi bw'urukingo rwa Covid19 ivuga ko mu igerageza ryakorewe ku mbeba no ku nkende, byagaragaye ko rwongera abasirikare barwanya iyo virusi mu mubiri. Ubu bagiye kurugeragereza ku bantu 90 bitanze bari hagati y'imyaka 18 na 80.