Minisitiri w’Ububanyi n’Amahanga wa Irani Zavad Zarif yakiriye abakuru b’umutwe w’abarwanyi b’Abalibani bo muri Afuganistani baganira ku buryo bwo kurangiza intambara muri icyo gihugu binyuze mu mishyikirano.
Umuvugizi w’Abatalibani yavuze ko Mullah Abdul Ghani Baradar, wungirije umukuru w’uwo mutwe akaba n’umukuru w’ibiro byawo muri Qatar, ari we wari uyoboye intumwa z’Abatalibani muri iyo nama.
Iyi ni inshuro ya kabiri abakuru b’Abatalibani bagiye i Tehran kuva imishyikirano bari bamazemo umwaka na Leta zunze ubumwe z’Amerika ipfubye mu kwezi kwa cyenda gutangira.
Ibi biganiro bibaye mu gihe Ikigo gishinzwe Iperereza ku by’Umutekano w’Amerika (U.S. Defense Intelligence Agency) kivuze ko Irani ikomeje gutanga inkunga ya gisirikare ku mutwe w’Abatalibani mu rwego rwo gushakisha uko Washington itagira ijambo muri Afuganistani.
Itangazamakuru rya Leta muri Irani kuri uyu wa gatatu ryatangaje ko mu mushyikirano Zarif yagiranye n’abo bashyitsi be, yashimangiye ko hakenewe ibiganiro bihuriwemo n’Abanyafuganistani bigamije gushyiraho ubutegetsi buhuriwemo na bose.