Ni mu rubanza nshinjabyaha abanyamamakuru batatu b'ikinyamakuru kigenga Umuseso baregwagamo. Urukiko rwasanze inkuru abo banyamakuru basohoye mu kinyamakuru UMUSESO no 382 cyo mu kwezi kwa 11 mu mwaka wa 2009 yivanga mu buzima bwite bw’abantu. Iyo nkuru yavugaga k'urukundo rw'ibanga hagati ya Minisitiri ushinzwe ibikorwa by'inama y'abaminisitiri, Protais Musoni, hamwe n'umuyobozi mukuru w'umujyi wa Kigali, Dr. Aisa Kirabo Kacyira. Urukiko rwavuze ko iyo nkuru yivangaga mu buzima bwabo bwite hakoreshejwe itangazamakuru.
Kubera iyo mpamvu, urukiko rwasanze icyaha kibahama. Rwahanishije umuyobozi mukuru w'ikinyamakuru Umuseso, Charles Kabonero, umwaka w'igifungo. Urukiko rwasobanuye ko ari isubiracyaha, kuko atari ubwa mbere ahanwe. Rwumvikanishije ko mu rubanza yaburanye na Depite Polisi Denis, mu mwaka wa 2006, bwana Kabonero yari yahanishijwe igihano cy'umwaka gisubitswe mu gihe cy'umwaka.
Naho umwanditsi mukuru w'ikinyamakuru Umuseso, Didas Gasana, hamwe n'umunyamakuru Richard Kayigamba, bo urukiko rwabakatiye amezi 6 y'igifungo kuri buri wese. Ku bihano bahawe bose uko ari batatu, nta n'umwe muri bo wahawe isubikagihano. Uko ari batatu kandi, nta n'umwe wari witabiriye isomwa ry’urwo rubanza rwabereye mu rukiko rw'ibanze rwa Nyarugenge mu mujyi wa Kigali.
Urukiko rwasanze nta mpamvu abo banyamakuru bahita batabwa muri yombi urubanza rukimara gusomwa, nk'uko byari byasabwe n'ubushinjacyaha. Urukiko rwasobanuye ko nta bimenyetso bifatika ubushinjacyaha bwarugaragarije byerekana ko bahunga ubutabera.
Urukiko kandi rwasanze nta mpamvu yo gufunga burundu ikinyamkuru Umuseso, nk'uko nabyo byari mu byifuzo by'ubushinjacyaha. Urukiko rwavuze ko ibyo ubushinjacyaha bwashingiyeho bubisaba, ntaho bihuriye n'ingingo ya 83 ndetse n'iya 84 y'itegeko rigenga itangazamakuru. Izo ngingo zivuga ku bihano no kubyaha byihariye bikozwe hakoreshejwe itangazamakuru.
Kw’ihazabu ya miliyoni 5 ubushinjacyaha bwari bwasabye ko buri munyamakuru yatanga, urukiko rwategetse ko buri wese yatanga miliyoni imwe. Ubwo uru rubanza rwaburanishwaga kuya 27 z'ukwezi gushize kwa mbere, abo banyamakuru b'Umuseso banze kuburana bitewe n'uko nta bwunganizi bari bafite.
Urukiko rwibukije abo banayamakuru batattu b'Umuseso ko bafite iminsi 30 yo kujuririra urwo rubanza. Babiri muri abo banyamakuru b’Umuseso bakatiwe, Chales Kabonero na Didas Gasana, bafite urundi rubanza mu kwezi gutaha kwa gatatu rubahanganishije n'Umunyemari Tribert Ayabatwa Rujugiro.