Perezida mushya w’Uburundi, Domitien Ndayizeye, arasaba abahutu barwanya ubutegetsi bw’i Bujumbura kwinjira muri guverinoma y’inzibacyuho.
Ibyo Perezida Ndayizeye yaraye abitangarije abanyamakuru i Dar-Es-Salaam muri Tanzania, amaze kubonana na mugenzi we Benjamin Mkapa uyobora icyo gihugu.
Muri ibyo biganiro byabo Perezida Mkapa yamwijeje inkunga y’igihugu cye m’uguhosha intambara yo mu Burundi imaze imyaka 10 yose.
Perezida Ndayizeye arasaba abarwanya ubutegetsi bw’Uburundi kwitabira guverinoma y’inzibacyuho mu gihe mu havugwa indi mirwano yahitanye abantu basaga 20 mu Burundi rwagati.
Ejo ku wa mbere amakuru aturuka mu gisirikari cya guverinoma y’Uburundi yavugaga ko ingabo zaho ngo ku cyumweru zari zishe abarwanyi b’umutwe FDD 23. Kugeza ubu umutwe FDD wanze kwinjira muri guverinoma y’inzibacyuho mu Burundi. Kubera izo mpamvu, amasezerano y’agahenge yari yasinywe mu kwezi kwa 12 k’umwaka ushize yaburiyemo inshuro nyinshi.
Havugwa ko intambara yo mu Burundi imaze guhitana abantu bagera ku bihumbi 300, biganjemo abasivili.
Perezida Domitien Ndayizeye yarahijwe tariki 30 Mata 2003. Azayobora Uburundi kugeza igihe hazabera amatora ateganijwe mu mpera z’umwaka utaha.
Shakira andi makuru yo mu karere hano.
Saba amakuru muri email yawe hano.