Muri Cote d’Ivoire abasirikari ba guverinoma n’abayirwanya bongeye kwesurana.
Umuvugizi w’igisirikari cya Cote d’Ivoire avuga ko ku wa 5 abarwanya ubutegetsi bagabye ibitero ku basirikari ba guverinoma mu burengerazuba bw’icyo gihugu, hafi k’umupaka na Liberia.
Umwe mu bayobozi b’abarwanya ubutegetsi bwa Cote d’Ivoire na we ku wa 6 yemeje amakuru y’iyo mirwano, anemeza ko abarwanyi be ngo bahitanye abasirikari ba guverinoma 300. Kugeza ubu ariko nta we udafite aho abogamiye wari wemeza uwo mubare.
Iyo mirwano mishya yatumye ikizere cyo kugarura amahoro muri Cote d’Ivoire abantu bari bafitiye guverinoma nshya irimo n’abahoze barwanya ubutegetsi kiyoyoka.
N’ubwo imirwano igikomeza muri Cote d’Ivoire ariko, abaminisitiri b’abarwanya ubutegetsi bemeye imyanya yabo muri guverinoma nshya muri iki cyumweru. Muri guverinoma igizwe na minisiteri 41, abarwanya ubutegetsi bafitemo imyanya 9.
Intambara yo muri Cote d’Ivoire imaze amezi 7. Muri ayo mezi 7 yahitanye ibihumbi n’ibihumbi by’abantu, inatuma abandi batagira ingano bata ingo zabo.
Shakira izindi nkuru z'Afurika hano.
Saba amakuru muri email yawe hano.