Raporo ishigwa ahabona n'ishirahamwe ry'agateka ka zina muntu Ligue Iteka ku vyakozwe mu mwaka w'i 2007 mu vyerekeye agateka ka zina muntu ivuga ko abantu amajana atandatu na mirongo ine n'umwe bishwe ataco bazira. Ligue Iteka ivuga ko abakoze ubwo bwicanyi usanga ari abasirikare b'igihugu, abaporisi, abagwanyi b'umuhari Palipehutu FNL n'abanyagihugu basanzwe.
Raporo yerekana ko abantu mirongo ibiri na babiri bishwe n'abasirikare,mirongo ine n'icenda bicwa n'abaporisi, amajana abiri na mirongo itandatu n'indwi bicwa n'abanyagihugu,mirongo icenda na batandatu bicwa n'umuhari Palipehutu FNL, amajana abiri n'indwi bicwa n'abantu batamenyekanye. Mur'ubwo bwicanyi bwose abicanyi ngo bakoresha inkoho ku bice birenga mirongo itanu na bitanu. Ubwicanyi ngo bufatiye ku busuma bw'abitwaje ibigwanisho, ukutumvikana mu vya poritike n'izindi nzanko cane cane zijanye n'imanza z'amatongo.
Ubwicanyi bwariyongeye ugereranije no mumwaka w'i 2006. Muri raporo dusoma ko mu 2006 hishwe abantu amajana atanu na mirongo itandatu n'indwi,mu 2005 hishwe amajana umunani na mirongo icenda n'umunani, mu 2004 amajana atandatu na mirongo itandatu n'indwi,mu 2003 igihumbi n'amajana ane na mirongo ibiri n'indwi,mu 2002 igihumbi n'amajana ane na mirongo ibiri n'umwe.
Ligue Iteka isaba reta kwihutira gukura ibigwanisho biharurwa mu bihumbi ijana mu banyagihu babifise batabifitiye uruhusha, kwigisha abasirikare n'abaporisi akazi kabo ntibabandanye bahohotera abanyagihugu, gukigira abanyagihugu cane cane abatagira inguvu no gushinga poritike itomoye y'abahoze kr'ugamba kubera kenshi aribo bakora ubwicanyi bakoresheje ibigwanisho. Reta isabwa kandi gukora poritike nzinza y'iterambere kugira ikure mu bukene abanyagihugu.