Intumwa idasanzwe ya ONU muri Siriya, Geir Pedersen arasaba ko ihohoterwa rihagarara hakabaho kurengera abaturage, mu gihe iki gihugu gihanganye n’urugomo rwongeye kwaduka nyuma y'amezi atatu Perezida Bashar al-Assad avuye ku butegetsi.
Ugutakamba kwa Geir Pedersen kuri uyu wa gatanu, byahuriranye n’isabukuru y’imyaka 14 ishize habaye imyigaragambyo yo guharanira demokarasi yatumye haba intambara y’abaturage yamaze imyaka irenga icumi mu gihugu.
Iyi ntumwa ya ONU, Pederson yavuze ko ayo “makimbirane yashyize ahagaragara ubujyakuzimu bw’icuraburindi ry’ubugome bw’ikirema muntu”. Yumvikanishije ko imiryango ikomeje kwunamira abayo bahatakarije ubuzima, abaturage bakiri kure y’ingo zabo, kandi ko ababarirwa muri za miliyoni bakomeje gushakisha ababo baburiwe irengero.
Kuri uyu wa gatanu, intumwa ya ONU, Pedersen yavuze ko amasezerano aherutse kuba hagati y’abategetsi b’inzibacyuho ba Siriya n’umutwe witwaje intwaro w’ingabo za demokarasi ya Siriya (SDF), “yibutsa ko ari ngombwa ko abanyasiriya bahurira hamwe mu buryo bugarura ubusugire bw’igihugu, ubumwe, ubwigenge n’ubudahangarwa bwacyo.”
Yahamagariye ishyirwaho rya “guverinoma y’inzibacyuho yizewe kandi itagira uwo iheza n’urwego rushinga amategeko, uburyo bwo gukoreramo bugendera ku mushinga w’itegeko nshinga rishya w’igihe kirekire kandi nabyo bikaba mu bwizerane, kudaheza n'ubutabera nyabwo bw'inzibacyuho.”
Umuryango w'abibumbye uvuga ko ayo makimbirane yakuye abantu bagera kuri miliyoni 12 mu byabo muri Siriya, harimo n'impunzi zirenga miliyoni 6.