Ibihumbi by'abaturage babarirwa mu bihumbi bahunze intambara hagati y'ingabo za leta ya Kongo n’abarwanyi b'umutwe Twirwaneho muri Teritware ya Mwenga, intara ya Kivu y’epfo.
Iyi mirwano ibaye mu gihe muri ako karere ka Minembwe bari bamaze umwaka nta ntambara ihavugwa.
Abaturage batuye mu mihana ya Kalingi , Bidegu , Kitavi , Ilundu ndetse na za Kiziba bahunze iyo mirwano bamwe muri bo bahungiye mu bihuru no mu mirima, abandi bahungira mu mihana iri mu nkengero za Minembwe.
Sebikamiro Rwaganje ni umuyobozi wa localite ya Kalingi yaraye ibereyemo intambara iri mu birometero bigera 13 na santere ya Minembwe. Yabwiye Ijwi ry’Amerika ko iyo ntambara yatangiye kuri uyu wa kane, ahagana saa tanu, ubwo abasirikare ba leta barashe ku birindiro bya Twirwaneho biri I Kalingi.
Abandi bavuga ko hari abantu bapfuye n'imitungo myinshi irangirika.
Mariko Kundabantu uyobora Diyakoniya y’abagatorika yo mu Kalingi, yavuze ko ibintu byo mu muhana wabo byasahuwe n’abasirikare bari bavuye Madegu na Mikenge.
Iyi mirwano yatumye bimwe mu bikorwa by’ubucuruzi birimo amaduka, amasoko, amashuri ndetse n’ibinyabiziga byirirwa bifunze kuko bamwe mu baturage bahunze, abandi na bo ntibararabukwa mu mihana yabo.
Ijwi ry'Amerika ryavugishije umuyobozi w’ingabo za Kongo mu Minembwe kuri iki kibazo cy’iyi mirwano abaturage bavuga ko ingabo zikorera brigade ya 34 zarashe ndetse zica amatungo yabo, atubwira ko atari muri ako gace kandi ko atari isoko y’amakuru yacu .
Cyakoze ku ruhande rw’abarwanyi ba Twirwaneho bo bemeza ko atari bo bateye ingabo za leta, ko ahubwo ari zo zabateye
Amakuru dukesha sosiyete sivile mu Minembwe yemeza ko bari bamaze umwaka mu gahenge n'amahoro. Gusa, muri aya mezi abiri ashize ingabo zikorera mu Minembwe bagiye bazishinja gufunga abaturage, ndetse no kwica inka zabo.
Iyi ntambara ibaye kandi mu gihe muri iki cy’umweru ahitwa Tabunde habaye imirwano hagati y’ingabo z’Uburundi n’inyeshyamba za Red Tabara, zirwanya ubutegetsi mu Burundi.
Aka karere ka Minembwe kuva mu mwaka 2018 kagiye kaberamo intambara y’imitwe yitwaje ibirwanisho yegamiye ku moko, ndetse imwe igafashwa n’inyeshyamba z’abanyamahanga.