Impunzi z’Abarundi ziri mu nkambi ya Mulongwe iri mu burasirazuba bwa Repubulika ya demokarasi ya Kongo zivuga zugarijwe ni icyorezo cya Korera. Imibare igaragaza ko mu kwezi kumwe gusa, abantu barenga 90 banduye icyo cyorezo.
Iki kibazo kiravugwa cyane mu mpunzi z’Abarundi ziganjemo iziheruka kuvanwa mu nkambi z’agateganyo za Kavimvira na Sange zikazanwa mu nkambi ya Mulongwe. Izo mpunzi zirenga 3,000 zivuga ko ubukene bw’amazi, imisarani n’isuku nke bigaragara aho batujwe ari byo ntandaro y’iki cyorezo.
Impunzi zanduye iyo ndwara ya Kolera amashyirahamwe ashinzwe ubuzima mu nkambi azohereza ku bitaro bikuru bya Baraka ahari ikigo gishinzwe kuvura no gukirikira abarwayi b’iyo ndwara.
Kubwa Odileye Ntihaniraho ,umugore uri mu kigero cy’imyaka 29 umaze ibyumweru bibiri avuye mu nkambi y’agateganyo ya Sange avuga ko ubuzima yasanze mu nkambi ya Mulongwe bushobora gutuma umubare mwinshi wandura Kolera.
Ijwi ry’Amerika ryagerageje kuvugisha umuyobozi w’akarere k’ubuzima ka Fizi kuri iki kibazo ntibyadushobokera. Gusa, Didier Numbi wa Numbi, umuyobozi komisiyo y’igihugu ishinzwe impunzi mu nkambi ya Mulongwe aremeza ko mu kwezi kumwe abantu barenga 90 ari bo banduye Kolera muri iyi nkambi.
Yabwiye Ijwi ry'Amerika ati:"Hashize ukwezi dufite Kolera aha mu nkambi. Ku ikubitiro yafashe abantu babiri, irakomeza iriyongera none igeze ku bantu 90 barenga. Muri byo bihe byose inzobere mu by’ubuzima zirimo akarere k’ubuzima ndetse n’abandi baterankunga barimo Croix Rouge, HCR, Caritas UNICEF, CNR, ndetse n’impunzi twarafatanyije mu kurwanya iki cyorezo none cyatangiye kugabanuka kuko mbere yo kuwa gatanu, abantu banduye bari benshi. Kuwa gatanu nta muntu wanduye, kuwa gatandatu habonetse umuntu umwe"
Mu rwego rwo kurwanya Kolera, uyu muyobozi avuga ko bafashe ingamba zirimo kubuza impunzi gufurira no gukoresha amazi y’umugezi utambuka mu nkambi ndetse no gukurikirana impunzi ziba amabati aba yubatse ku misarani. Usibye iki kibazo cya Kolera, izi mpunzi ziri mu bihangare zifite, zivuga kandi ko zugarijwe n'ibibazo birimo inzara n’uburaro butari bwiza.
Inkambi ya Mulongwe iri muri Teritware ya Fizi irimo impunzi z’Abarundi zigera 15,000. Muri ibihe by’imvura amazi akunze kubura bitewe n’uko ibipompa bitanga amazi bikoreshwa n’imirasire y’izuba.
Umuyobozi ushinzwe kurwanya icyorezo cya Kolera muri Repubulika ya demokarasi ya Kongo Placide Welo, mu kwezi gushize yatangaje ko abantu 26,000 ari bo banduye Kolera mu gihugu hose.
Fyonda hasi wumve ibindi kuri ino nkuru ya Vedaste Ngabo.