Africa CDC, Ikigo gishinzwe gukumira no kurwanya indwara muri Afrika, irasaba Leta zunze ubumwe z’Amerika gukuraho icyemezo cyo gukumira ingendo mu Rwanda yari yarafashe mu kwezi kwa cumi gushize kubera icyorezo cya Marburg, kubera ko iki cyorezo cyarangiye.
Umuyobozi mukuru wa Africa CDC, Muganga Jean Kaseya, yandikiye ibaruwa minisitiri w’ubuzima wa Leta zunze ubumwe z’Amerika, Xavier Becerra, n’umuyobozi mukuru wa US CDC, Ikigo cya Leta zunze ubumwe z’Amerika gishinzwe gukumira no kurwanya indwara, Mandy Cohen, ababwira ko u Rwanda rwaranduye icyorezo cya Marburg.
Aragira, ati: “Kw’itariki ya 17 y’ukwezi kwa 11, iminsi 18 yari yuzuye nyuma y’uko u Rwanda rutangaje umuntu wa nyuma na nyuma wanduye Marburg. Abayirwaye bose baravuwe barakira neza kandi leta y’u Rwanda yashyizeho ingamba zikaze zo gukurikirana aho abanduye bose 100 ku’ijana banyuze hose kugirango icikize uruhererekane rwayo mu bantu hakiri kare mu gihugu no muri Afrika.”
Africa CDC isobanura ko u Rwanda rukesha iyi ntsinzi ku bufatanye bwahise butangira byihuse cyane hagati ya minisiteri yayo y’ubuzima, Africa CDC, OMS (Ishami ry’Umuryango w’Abibumbye ryita ku buzima), n’abandi bafatanyibikorwa mpuzamahanga.
U Rwanda rwatangaje bwa mbere ku mugaragaro ko rwatewe na virusi ya Marburg kw’itariki ya 27 y’ukwa cyenda gushize. Abantu bayanduye bose hamwe ni 66. Muri bo 51 barakize neza. Abandi 15 yarabahitanye. Bamaze kubisuzuma neza, Africa CDC na OMS baremeza badashidikanya ko ibyago bwo kwandura virusi ya Marburg ari bito cyane mu Rwanda, kandi ko itigeze iboneka inyuma y’u Rwanda mu mahanga no muri Leta zunze ubumwe z’Amerika.
US CDC nayo irabyemeza gutyo. Naho leta y’u Rwanda yongeraho ko yafunze aho abanduye virusi ya Marburg bavurirwaga hose.
Kw’itariki ya 7 y’ukwa cumi gushize, Leta zunze ubumwe z’Amerika yashyizeho ingamba zo gukumira ingendo mu Rwanda. Zirimo kugira inama abaturage bayo kwirinda kujya mu Rwanda atari ngombwa. Naho ku bantu bava mu Rwanda, Leta zunze ubumwe z’Amerika ibajyana bose ku bibuga by’indege bitatu byonyine gusa, ari byo O’Hare mu mujyi wa Chacago, John F. Kennedy i New York, na Washington Dulles. Babanza gusuzumwa mbere yo kwemererwa kwinjira mu gihugu.
Africa CDC ivuga ko byagize ingaruka ku Rwanda, by’umwihariko ku bukerarugendo n’ubucuruzi, inzego ebyiri zifitiye ubukungu bwarwo akamaro kanini. Irasaba Leta zunze ubumwe z’Amerika gusuzuma neza uko byifashe mu Rwanda, ifatanyije n’izindi nzego mpuzamahanga z’ubuzima, no gusubira ku cyemezo cyayo ibihereyeho.
Muganga Kaseyausyobora Africa CDC, ashimangira ko “byaba ari uburyo bwo gushima ibyo u Rwanda rwakoze mu rwego rwo kurwanya icyorezo cya Marburg no gufasha ubukungu bwarwo kuzahuka.”