Mu gihe cy'icyumweru kimwe gusa, abanyamakuru 13 bahunze intambara mu bice byo mu burasirazuba bwa Repubulika ya demokarasi ya Kongo, bamaze kwibasira n’ibitero by’abagizi bwa nabi.
Bane muri bo barakomeretse bajyanwa ku bigo nderabuzima abandi bahitamo kuva mu mujyi wa Goma kubera guterwa ubwoba n’abantu batazwi.
Ni imibare yatanzwe n’ihuriro ry’Abanyamakuru bahunze intambara rizwi nka Synergie des Journalistes Déplacés. Abo banyamakuru kuri ubu bacumbikiwe mu mujyi wa Goma.
Iri huriro ribivuze nyuma yuko hari abanyamakuru batatu bahunze bamaze guhohoterwa ubwo barimo bava mu kazi kabo.
Justin Bizimana, uyobora iryo huriro ry'abanyamakuru avuga ko abo banyamakuru bakubiswe, nyuma bakwa ibikoresho byabo birimo kamera n’ibyuma bifata amajwi.
Umwe muri bo ni Patience Cyuzuzo Ngorora, ukorera radiyo y’abaturage Umoja, yari isanzwe ikorera mu gace ka Ngungu muri teritware ya Masisi. Uyu arasaba ubuyobozi gukaza ingamba z’umutekano we, ndetse n’abandi bagenzi be bahunze
Benshi muri aba abanyamakuru bahunze imirwano baturutse muri teritware za Masisi na Rutshuru mu ntara ya Kivu ya ruguru.
Bahunze ubwo imirwano yari ikaze hagati y'ingabo za leta n'imitwe izishyigikiye n'abarwanyi b'inyeshyamba za M23.
Bavuga ko baterwa ubwoba n’abantu batandukanye batazwi, igihe cyose batanze amakuru ku bibera mu nkambi z’impunzi zitandukanye zo mu mujyi wa Goma na teritware ya Nyiragongo.
Bavuga kandi ko baterwa impungenge no kubona ntacyo inzego za leta zikora kugirango ababagirira nabi bakurikiranywe.
Ku rundi ruhande ishyirahamwe rirengera uburenganzira bw’abanyamakuru, Journalistes en Danger, JED, ryabwiye Ijwi ry’Amerika ko abanyamakuru bahunze bahura n’ihohoterwa biyongera ku bandi umunani basanzwe bakorera mu mujyi wa Goma bakorewe ihohoterwa kuva mu ntangiro z’ukwezi kwa 10.
Tuver Wundi, uhagarariye ishyirahamwe JED mu ntara ya Kivu ya ruguru, arasaba abanyamakuru bose muri rusange kwitwararika cyane muri iki gihe umutekano utameze neza mu burasirazuba bwa Kongo.
Raporo ya JED yo mu kwezi kwa 10 igaragaza ko kuva mu ntangiro z’uyu mwaka wa 2024, abanyamakuru bagera ku 174 muri Kivu ya ruguru, bahuye n’ihohoterwa, 47 muri bo barakomereka, abandi bagera kuri 12 baricwa.
Your browser doesn’t support HTML5
Abanyamakuru bahohoterwa muri Kivu ya ruguru