Ayachi Zammel, wabaye Kandida Perezida muri Tuniziya, yakatiwe igifungo cy’imyaka ibiri n’amezi umunani, kuri uyu wa mbere, bituma igifungo cye cyose hamwe, kigera ku myaka 35, nyuma y’imanza zabanjirije uru.
Zammel, umwe mu bakandida babiri gusa, bemerewe guhangana na Perezida Kais Saied mu kwezi gushize, yatawe muri yombi mu ntangiriro z’ukwezi kwa cyenda, umunsi nyirizina abayobozi bemerejeho kandidatire ye mu itora.
Umunyamategeko Abdessatar Messaoudi, umwunganira mu rukiko rw’i Marouba, hafi y’umurwa mukuru wa Tuniziya, Tunis, yatangaje ko urukiko rwongereye imyaka ibiri n'amezi umunani ku gihano cye, nyuma yo kumuhamya icyaha cyo guhindura impapuro z’abamushyigikiye kugirango abashe kwiyamamaza.
Messaoudi yavuze ko Zammel w'imyaka 47 y’amavuko, yakatiwe igifungo cy'imyaka 35. Yongeyeho ko uyu wahoze ari umukandida, akurikiranwa mu manza 37 zitandukanye.
Uyu munyamategeko avuga ko buri cyemezo kivuga ko urupapuro rushyigikira Zammel nk’umukandida, rwahinduwe, ari impamvu yo gutangiza urubanza rushya.
Nk’uko byatangajwe n’urwego rushinzwe amatora muri Tuniziya, ISIE, Zammel wahoze ari umudepite, umunyemari, akaba n’umuyobozi w’ishyaka, yabonye amajwi agera kuri arindwi ku ijana mw’itora rya perezida, mu 2019, mu gihe Saied yatsindiye ku majwi arenga 90 kw’ijana.
Kuva amaze gutorwa, Prezida Saied yikubiye ubutegetsi, asesa inteko ishinga amategeko anavugurura itegeko nshinga. (AFP)