Hirya no hino muri Leta zunze ubumwe z’Amerika bari mu bikorwa byo kubarura amajwi nyuma y’amatora y’umukuru w’igihugu yabaye kuri uyu wa kabiri.
Leta ya Arizona imwe muzishobora kuzavamo amajwi azemeza umukuru w’igihugu utaha, ibiro by’amatora byafunze mu kanya.
Muri iyo Leta ya Arizona, ibikorwa byo gutora byagenze neza muri rusange. Kuri za biro z’itora Ijwi ry'Amerika ryasuye henshi hari imirongo mirere bigaragaza ubwitabire buri ku rwego rwo hejuru. Ni mu gihe kandi abatora bagera hafi kuri miliyoni ebyiri bari baratoye mbere.
Ibibazo by’ubukungu, ubuzima buhenze, demokarasi, kugabanya umubare w’abimukira binjira muri Amerika bakoresheje umupaka Leta ya Arizona ihana na Megisike ni bimwe mu bintu byari ku mitima y’abatuye iyi leta.
Aime Bideri, Ijwi ry'Amerika ryamusanze ku biro by’itora kuri kaminuza ya Arizona State. Mu kiganiro n’Ijwi ry’Amerika yatugaragarije ko afite ubwoba ko Donald Trump aramutse yongeye gutorwa demukarasi muri iki gihugu yaba ihuye n’ibibazo.
Ibivugwa na Bideri w’umudemokarate, si ko byemerwa na mugenzi we Frederic Ntuye Kibogora w’umurepubulikani. Avuga ko Trump aramutse atowe azongera guhesha ishema Amerika ku ruhando mpuzamahanga akanafasha guhagarika intambara zimaze iminsi zibasiye isi.
Leta ya Arizona ni imwe muri leta zisibaniro. Ibipimo by’abatora bigaragaza ko abakandida begeranye cyane ku buryo bigoye kwemeza umukandida uzagutsinda aya matora. Ku mudemokarate Aime Bideri, asanga umukandida Kamala Harris afite amahirwe.
Naho Frederick Ntuye we asanga igihugu muri iki gihe gikeneye Donald Trump kugirango ahangane n’ibibazo bigikomereye birimo umutekano w’imipaka kugirango bahagarike ubwiyongere bw’abimukira binjira mu gihugu bitemewe n’amategeko.
Mu myaka 76 ishize, abaperezida batatu bonyine b’abademokarate ni bo bamaze kuzitsinda leta ya Arizona. Ikindi gihe cyose yagiye itsindwa n’abarepubulikani. Abademokarate baheruka kuyitsinda ni Joe Biden mu 2020 na Bill Clinton mu 1996.
Fyonda hasi wumve ibindi kuri ino nkuru Eddie Rwema, Intumwa y'Ijwi ry'Amerika muri Arizona.
Your browser doesn’t support HTML5
Amatora y’Amerika mu Ndorerwamu z’Abimukira b’Abanyafrika