Ubushinjacyaha mu Rwanda bwasabiye Nyampinga w’u Rwanda mu mwaka wa 2022, Divine Muheto gufungwa umwaka umwe n’amezi umunani ku byaha byo gutwara imodoka yanyoye, ibisindisha birengeje igipimo, kugonga ibikorwa remezo no guhunga aho yabikoreye. Muheto yemeye ibyaha bibiri, asaba imbabazi asaba gufungurwa.
Miss Nshuti Muheto Divine yitabye Urukiko rw’Ibanze rwa Kicukiro mu gitondo cyo kuri uyu wa kane. Yagejejwe ku rukiko mbere y’uko amasaha asanzwe y’akazi atangira, ku buryo itangazamakuru ryahageze yamaze kugezwa mu cyumba cy’urukiko.
Iburanisha ritangiye, ijambo rya mbere umucamanza yabwiye abari bahari ni uko bibujijwe gufata amajwi n’amafoto. Abanyamakuru benshi, cyane cyane abakorera ku mbuga Nkoranyambaga, bari mu kibuga cy’urukiko bategereje ko yasohoka bakabasha kumufata ifoto
Ubushinjacyaba burega Miss Muheto Divine ibyaha bitatu. Icyo gutwara yasinze kandi nta ruhushya rwo gutwara ibinyabiziga afite, icyo kwangiza ibikorwa Remezo, ndetse akanagerageza guhunga. Ubushinjacyaha bwavuze ko ibi byaha Miss Nshuti Muheto Divine yabikoreye mu karere ka Kicukiro, ubwo yari avuye mu kabari yanyoye ibisindisha birenze urugero.
Umushinjacyaha yavuze ko bamusanzemo ibisindisha mu mubiri we bingana na 4.00 kandi umuntu muzima yemerewe 0.80. Ubushinjacyaha buvuga ko muri iyo mpanuka hangiritse poto y’amashanyarazi ndetse n’umukindo ku muhanda.
Ubushinjacyaha bwanagaragaje ko Muheto yahise atoroka ubutabera bubishingiye ko aho yakoreye impanuka umupolise wo mu muhanda yahageze undi yahavuye ko yaje kuhagaruka aje gushaka telefoni ye yari yasize mu modoka.
Muheto yahawe ijambo avuga mu ijwi rito cyane ko yemera ibyaha 2 muri 3 aregwa. Yagaragaraga areba imbere gusa avuga ijwi rito, ryumvikana nk’iririmo ubwoba.
Yasubije yemera ibyaha ashinjwa, uretse icyo gutoroka nk’uko ubushinjacyaha bubivuga. Yagaragarije urukiko ko icyaha cyo gutoroka atakemera, kuko yavuye aho yakoreye impanuka abona arimo gushungerwa n’abantu benshi akigirayo ngo batamugirira nabi. Yongeyeho ko abonye umupolise ageze aho yakoreye impanuka, yahise agaruka.
Abunganira Nyampinga w’u Rwanda Muheto, uko ari 3 bahawe ijambo bagaragaza ko umukiliya wabo yemera ibyaha 2 muri 3 kandi akabisabira imbabazi, akavuga kandi ko atigeze agora inzego z’Ubugenzacyaha mu gihe cy’ibazwa.
Ubushinjacyaha bwasabiwe Muheto gufungwa umwaka umwe n’amezi 8, agatanga n’ihazabu y’ibihumbi 220. Abanyamategeko bamwunganira basabye urukiko kurekura umukiliya wabo, kuko n’abandi bakora ibyaha byo gutwara ibinyabiziga banyoye ibisindisha badafungwa ahubwo batanga amande.
Muheto ubwe yumvikanye mu ijwi rito asaba urukiko kumubabarira, ndetse yongeraho ko iminsi 11 amaze afunze yakuyemo isomo rikomeye. Nyampinga Muheto yafashwe tariki ya 20 z’uku kwezi, ariko Polise ibitangaza bwa mbere tariki ya 29 z’uku kwezi.
Ifungwa rye ryavugishije benshi ku mbuga nkoranyambaga. Hari n’ababiciyemo umugani bati” Ubwiza bw’umukobwa bumugeza ibwami ariko ubwenge bwe ni bwo bugena iminsi azahamara”
Undi yagize ati” Nibamuhe igihano gisubitswe Muheto yishyure ibyo yangirije kandi bamwihanangirize ntazasubire gutwara imodoka nta burenganzira. Abandi bati, byaba byiza bamukoresheje n'imirimo rusange yabera urugero urungano.
Undi yagize ati”Njye numva kubera ubucucike bugaragara mu magororero yacu ndetse no muri kasho za Polisi, uwakoze icyaha kitabangamiye umudendezo w'igihugu ndetse n'abanyarwanda muri rusange yajya acibwa amande agataha.
Muheto Divine, ufite imyaka 20 y’amavuko, amaze iminsi 11 afunzwe kuva afashwe. Urubanza rwe ruzasomwa tariki 06 z’ukwezi gutaha kwa 11 saa cyenda z’amanywa.
Fyonda hasi wumve ibindi kuri ino nkuru y'Umumenyeshamakuru w'Ijwi ry'Amerika Assumpta Kaboyi.
Your browser doesn’t support HTML5
Miss w'u Rwanda Muheto Asabirwa Igifungo cy'Umwaka n'Amezi 8