John Kelly wahoze ari umukuru w’ibiro bya Donald Trump akiri Perezida yashinje uyu wahoze ari umukuru w’igihugu kuba umuhezanguni w’umunyagitugu.
Kelly wayoboye ibiro bya Trump igihe kinini gusumbya abandi, yavuze ko uyu mukandida w’ishyaka ry’abarepubulikani, ubwo yari ku butegetsi, yigeze gushimagiza Adolph Hitler wari umukuru w’abanazi, avuga ko “hari ibintu byiza yakoze.”
Ibyatangajwe na John Kelly, umujenerali wavuye ku rugerero wakoranye na Trump mu ngoro y’umukuru w’igihugu kuva muw’2017 kugeza muw’2019, byasohotse mu kiganiro yagiranye n’ibinyamakuru The New York Times na The Atlantic, kuwa kabiri w’iki cyumweru.
Ibyo biriyongera ku miburo yatanzwe mu bihe byashize n’abandi bategetsi bakuru bakoranye na Trump, bavuga ku myitwarire ye. Ni mu gihe habura ibyumweru bibiri ngo amatora abe.
Kelly yakunze kunenga cyane Trump ndetse yaherukaga kumushinja gutuka abasirikare baguye ku rugamba abita “ibigoryi” n’ “ibigwari.” Ibi atangaje bije mu gihe Trump, urimo guhatanira manda ya kabiri, yiyemeje kuzagura bikomeye imikoreshereze ye y’igisirikare imbere mu gihugu.
Uyu wahoze ari umukuru wa Amerika avuga ko azakoresha ingufu za gisirikare mu guhiga abanyamerika afata “nk’abanzi b’imbere mu gihugu.”
Bwana Kelly, mu kiganiro n’ikinyamakuru The New York Times, yibutsa ibyavuzwe na Trump, yagize ati: “Yabivuze ubugira kenshi avuga ngo, ‘urabizi, Hitileri nawe hari ibintu byiza yakoze.”
Kelly yavuze ko yageragezaga guhagarika ikiganiro kuri iyi ngingo, abwira uyu wahoze ari perezida ngo “nta kintu Hitler yakoze, wavuga ko cyari cyiza.” Ariko Trump we agakomeza kugarura iyo ngingo.
Mu kiganiro na The Atlantic, Kelly yibukije ko hari ubwo Trump yazanye igitekerezo cy’uko akeneye “abajenerali nk’ab’Abadage.” Aha uyu mujenerali wavuye ku rugerero, avuga ko yabajije Trump niba ashatse kuvuga “abajenerali nk’abo ku bwa Bismarck,” Chancelier wayoboye mu gihe cy’ukwihuza k’Ubudage.
Aha Kelly yibuka ko yamubajije ngo, “Nta gushidikanya, ntiwavuga abajenerali ba Hitileri.” Aho uwahoze ari Perezida yasubije ngo, “Yego, yego, abajenerali ba Hitileri.”
Abashinzwe kwamamaza Trump, kuri uyu wa Kabiri, ibyo barabihakanye. Umuvugizi wabo Steven Cheung yavuze ko Kelly “yitesheje agaciro hamwe n’izi nkuru z’ibinyoma yahimbye.”
Amakusanyabitekerezo yerekana ko irushanwa ryo guhatanira umwanya w’umukuru w’igihugu muri za leta z’isibaniro rikegeranye
cyane. Kandi Trump na Visi Perezida Kamala Harris baracyanyuranamo bazenguruka igihugu mu kugerageza kwigarurira amajwi y’abatora batarafata umwanzuro k’uwo bazaha amajwi yabo.
Abashinzwe kwamamaza Harris bamaze igihe kinini begera abatora badafite aho babogamiye. Aha barifashisha ubufasha bw’abarepubulikani bamaze igihe kinini muri iryo shyaka, nk’uwahoze ari depite Liz Cheney, cyo kimwe n’amagambo nk’aya ya Kelly. Ni mu rwego rwo guhamagarira abari batoye Trump mbere kutamutora mu matora yo muri uku kwa 11.
Abashinzwe kwamamaza Harris bahamagaje abanyamakuru kuri uyu wa Kabiri, mu rwego rwo kuzamura amajwi y’abategetsi ba gisirikare bavuye ku rugerero, bagaragaje uburyo benshi mu bakoranye na Trump mbere ubu batakiri ku ruhande rwe.
Steve Anderson, Burigadiye Jenerali wavuze ku rugerero, yagize ati: “Abantu bamuzi neza ni nabo bamurwanya cyane, batamushaka nka perezida.”
Anderson yavuze ko yifuza ko Kelly yashyigikira Harris byimazeyo kurusha Trump, ikintu atarakora. Nyamara Kevin Carroll, Koloneli wavuye ku rugerero, wanahoze ari umujyanama mukuru wa Bwana Kelly, kuri uyu wa Gatatu yavuze ko uyu wahoze ari umutegetsi mukuru mu biro bya Trump “yahitamo guhekenya ibimene by’ibirahuri aho gutora Trump.”
Mbere yo kuba umuyobozi mukuru w’ibiro bya Perezida Trump, Kelly yabaye minisitiri ushinzwe umutekano mu gihugu, aho yayoboye ibikorwa bya Trump byo kugerageza kubaka urukuta ku mupaka w’Amerika na Megizike.
Kelly kandi yari ku ruhembe rw’imbere rw’ibikorwa by’ubutegetsi bwa Trump bijyanye na politiki yo guhiga bukware abimukira. Ibyo bikaba byaratatanyije ibihumbi n’ibihumbi by’abimukira b’ababyeyi n’abana babo kuri uyu mupaka wo mu majyepfo.
Ibyo byatumye afatwa nk’umugome ruharwa kuri benshi bo ku ruhande rw’abademokarate, barimo na Harris.
Kelly si we muntu wa mbere wahoze ari umutegetsi wo hejuru mu gihe cya Trump ugaragaje uyu wahoze ari perezida nk’intambamyi.
Mark A. Milley, Jenerali wavuye ku rugerero, wahoze ari umugaba mukuru w’ingabo kubwa Trump, yabwiye Bob Woodward mu gitabo aheruka kwandika cyitwa “War” – Intambara mu Kinyarwanda, ko Trump ari “umunyagitugu birenze” n’ “umuntu uteje akaga gakomeye ku gihugu.”
Ndetse na Jim Mattis, Jenerali wavuye ku rugerero, wabaye minisitiri w’ingabo ku bwa Trump, nawe nyuma yaba yarabwiye Woodward ko yemeranya n’isesengura rya Milley.
Mu izamuka rye mu ruhando rwa politiki, Trump umunyemari waje guhinduka umenyapolitiki yagiye ashyigikirwa cyane n’abasirikare bavuye ku rugerero.
Ubushakashatsi ku matora bwakozwe n’ibiro ntaramakuru by’Abanyamerika – AP bwerekanye ko 6 ku 10 mu basirikare bavuye ku rugerero, muw’2020 batoye Trump. Ibyo bikaba uko no kuri kimwe cya kabiri cy’abantu bafite umusirikare wavuye ku rugerero mu ngo zabo.
Mu matora y’ibanze y’ishyaka ry’Abarepubulikani muri leta ya Karolina y’Epfo uyu mwaka, ubu bushakashatsi bwa AP bwasanze hafi 2/3 by’abasirikare bavuye ku rugerero ndetse n’abantu bafite abavuye ku rugerero mu ngo zabo baratoye Trump aho gutora uwahoze ari Guverineri Karolina y’Epfo Nikki Haley, umukeba ukomeye mu bari bahanganye nawe mu matora y’ibanze y’Abarepubulikani y’uyu mwaka wa 2024
Your browser doesn’t support HTML5
John Kelly Wayoboye Ibiro bya Trump Aramushinja Igitugu n'Ubuihezanguni