Leta zunze ubumwe z’Amerika izaha Sudani izindi miliyoni 424 z'amadolari mu bikorwa by’ubutabazi yo gufasha abaturage b’iki gihugu, nk'uko Ambasaderi w’Amerika mu muryango w’abibumbye Linda Thomas-Greenfield yabitangaje kuri uyu wa gatatu.
Ambasaderi Thomas-Greenfield yagize ati: "Abanyasudani barenga miliyoni 25 bugarijwe n'inzara ikabije.
Benshi barashonje kandi abagera kuri miliyoni 11 bataye ingo zabo mu gihe cy’ibibazo by’ingutu byugarije ikiremwa muntu, kurusha ahandi kw’isi.
Yagomeje avuga ati: "Tugomba guhatira impande zishyamiranye kwemera guhagarika imirwano i al-Fashir muri Khartoum no mu bindi bice birimo umutekano muke, gukuraho za bariyeri zizitira imiryango y’ubutabazi, ku mihanda yose, no gushyira intwaro zabo hasi ndetse no kujya ku meza y’ibiganiro”.
Intumwa y’Amerika muri ONU, yavuze ko ibyatangajwe, bitumye imfashanyo yose hamwe ya Leta zunze ubumwe z’Amerika, kuri Sudani, kuva intambara itangiye hagati mu kwezi kwa kane umwaka ushize, igera kuri miliyari 2 z’amadolari. (Reuters)