Abayobozi bashinzwe ubuzima muri Sudani ejo ku cyumweru batangaje ko kolera yishe abantu batari munsi ya 388 kandi abandi bantu bagera mu 13.000 barwaye iyo ndwara mu mezi abiri ashize.
Minisiteri y’ubuzima muri Sudani yavuze ko iyi ndwara yabonetse mu ntara 10 kuri 18 zigize igihugu, aho intara ya Kassala n’iya al-Qadarif zo mu burasirazuba ari zo zibasiwe cyane.
Icyo cyorezo kije mu gihe ubushyamirane bumaze amezi arenga 17 hagati y’ingabo z’igihugu n’umutwe witwara gisirikare wa Rapid Support Forces, nta kimenyetso cyerekana ko yaba iri hafi kurangira.
Sudani yinjiye mu kaduruvayo mu kwezi kwa kane kw’umwaka ushize, ubwo hadukaga umwuka mubi hagati y’izo mpande zishyamiranye, bikavamo intambara yeruye mu mpande zose z’igihugu. (AP)