Imiryango iharanira uburenganzira bwa muntu, uyu munsi kuwa gatanu, yavuze ko abanyakenya batatu, bari bamaze igihe baraburiwe irengero nyuma yo gushimutwa, barekuwe.
Iyo miryango ishinja abashinzwe umutekano kubamarana ibyumweru bagizwe imbohe, nyuma yo kugira uruhare mu myigaragambyo yamaganaga guverinema.
Ibiro ntaramakuru by'Abafaransa, AFP, bitangaza ko abo batatu bivugwa ko bashimuswe n'abagabo biyita abapolisi kw’itariki ya 19 y’ukwezi gushize kwa munani, i Kitengela mu birometero bigera muri 30 uvuye mu majyepfo y'umurwa mukuru wa Kenya, Nairobi.
Amashusho yashyizwe ku mbuga nkoranyambaga yerekanaga babiri muri abo bagabo, basa n’abahungabanye, nyuma yo kurekurwa.
Kugeza ubu nta makuru yemeza aho Bob Njagi, Aslam Longton, n’umuvandimwe we Jamil Longton bari bafungiwe.
Ishimutwa ryabo rwavuzwe cyane mu bitangazamakuru byo muri Kenya mu minsi yashize, nyuma y’uko urukiko rw’i Nairobi, rufashe umuyobozi mukuru w’agateganyo wa polisi, Gilbert Masengeli, bitewe no gusuzugura urukiko akanga kwitaba, ngo asubize ibibazo kw’izimira ry’abo bagabo batatu.
Masengeli, yari yahawe kugeza kuri uyu wa gatanu ngo azabe yitabye urukiko, kugira ngo yirinde igihano cy’igifungo cy'amezi atandatu.