Repubulika ya demukarasi ya Kongo yakiriye inkingo za mbere z’indwara y’ubushita bw’inkende kuri uyu wa kane.
Abakozi b’inzego zishinzwe ubuzima baravuga ko bizeye ko zizagira uruhare rukomeye mu kurinda ikwirakwira ry’iyi ndwara Umuryango w’Abibumnbye uheruka kwemeza ko ari icyorezo gihangayikishije isi.
Indwara y’ubushita bw’inkende yatangiriye muri Repubulika ya demukarasi ya kongo ikwira mu bihugu bituranye na yo n’ahandi muri Afurika ariko ibura ry’inkingo ryatumye kuyikumira biruhanya.
Indege itwaye imiti yatanzwe n’umuryango w’ubumwe bw’ibihugu by’Uburayi yageze mu murwa mukuru i Kinshasa isaa saba zo muri icyo gihugu kuri uyu wa kane nkuko bitangazwa n’umunyamakuru w’ibiro ntaramakuru by’Abongereza, Reuters, wari uhari.
Inkingo za mbere zahageze ni 99 000 hakaba hategerejwe izindi kuwa gatandatu, zose hamwe zikazagera ku 200 000 nkuko byatangajwe na Laurent Muschel, uyobora ibiro by’umuryango w’ubumwe bw’Uburayi bishinzwe kwita ku bibazo bitunguranye byerekeye ubuvuzi.
Yavuze ko muri rusange Uburayi buzatanga inkingo 566 000 bushingiye ku hazaba hagaragara indwara y’ubushita bw’inkende kurusha ahandi.