Perezida Volodymyr Zelenskiy wa Ukraine yatangaje ko ingabo z’igihugu cye zafashe ikindi cyaro cy’Uburusiya mu gihe yasuraga agace kari hafi y’umupaka w’ibihugu byombi Ukraine yigaruriye mu byumweru bibiri bishize.
Ukraine kandi yavuze ko yarashe ibisasu ku kibuga cy’indege kiri mu majyepfo y’Uburusiya ikoresheje indege z’intambara zo mu bwoko bwa drone.
Ni mu rwego rwo kwivuna ingabo z’Uburusiya zikomeje gutsura ibirindiro mu burasirazuba bw’igihugu, nyuma y’imyaka irenga ibiri zishoye intambara kuri Ukraine.
Hagati aho, Uburusiya bwavuze ko bwashubije inyuma ingabo za Ukraine zashakaga kumenera ku wundi mupaka w’ibihugu byombi utandukanye n’aho zinjiriye taliki ya 6 z’ukwezi kwa munani.
Iki gitero cyari cyagabwe mu birometero 240 uvuye mu karerere ka Kursk aho Ukraine iheruka kwigarurira, bigaragaza ko Ukraine ishobora kuba ishaka kwerekeza intambara ku mipaka ihana n’Uburusiya.
Ukraine imaze igihe yigamba intsinzi ku rugamba kuva aho igabye igitero cy’italiki 6 zuku kwezi ariko Uburusiya buguma kwigira imbere mu burasirazuba bw’igihugu.
Ministeri y’ingabo y’Uburusiya kuri uyu wa kane yatangaje ko yigaruriye icyaro cy’ahitwa Mezhove mu karere ka Donetsk ko mu burasirazuba bwa Ukraine.