Umuryango uharanira uburenganzira bwa muntu, Amnestie Internationale, ejo kuwa kabiri watangaje ko Etiyopiya yananiwe guhagarika ihohotera rikomeye ry'uburenganzira bwa muntu mu turere turimo amakimbirane.
Ku rundi ruhande, umuryango Human Rights Watch wamaganaga ifungwa ry’umuvandimwe w’uwari umuyobozi utavuga rumwe n’ubutegetsi wishwe. Bate Urgessa, wari umunyamuryango ukomeye wa Oromo Liberation Front (OLF) yabonetse yapfuye mu mujyi wa Meki w’intara ya Oromia mu kwezi kwa kane.
N'ubwo intambara y’imyaka ibiri yarangiye mu ntara ya Tigreya, iherereye mu majyaruguru mu kwezi kwa 11 umwaka wa 2022, haracyari amakimbirane menshi muri Etiyopiya, cyane mu ntara z’Amhara na Oromiya.
Amnestie yavuze ko ihohotera ry'uburenganzira bwa muntu rikomeje "nta nkomyi" mu ntara y’Amhara, mu gihe amakuru avuga ko amarorerwa yabereye muri Tigreya ndetse n'ihohotera muri Oromia "ahanini bitigeze bikemurwa".
Uyu muryango ugira uti: "N'ubwo hari abavuga ko biyemeje ubutabera, cyane cyane binyuze mu nzira ziswe iz’inzibacyuho z’ubutabera, abategetsi ba Etiyopiya bananiwe guhagarika aya makosa."
Amnestie ibivuga muri aya magambo: "Miliyoni y'Abanyetiyopiya yimwe ubutabera n’ubwo ubuzima bwabo bwahungabanijwe n'amakimbirane."
Uyu muryango wongeraho ko ibivuga ko ingabo za Minisitiri w’intebe Abiy Ahmed zitakoze ubwicanyi "byerekana ko guverinoma ikomeje guhakana ibyaha by’ahahise ndetse n’iby’ubu".
Wasabye abafatanyabikorwa bo muri Afurika ndetse n’izindi nzego zishinzwe uburenganzira bwa muntu ku isi "gufata ingamba zihutirwa zo gukora iperereza ku byaha bivugwa mu ntara y’Amhara". (AFP)