Muri Nijeriya umuyobozi mukuru wa Polisi yatangaje ko yasabwe abapolisi bose kuryamira amajanja avuga ko bashobora gusaba igisirikare kuyifasha guhosha imyigaragambyo yabyaye imvururu mu mujyi imwe n’imwe yo muri icy’icyo gihugu.
Imwe mu mijyi irimo umurwa mukuru Abuja na Kano mu majyaruguru ejo kuwa kane yiriwemo imyigaragambyo yaranzwe n’ubusahuzi no guhangana hagati ya polisi n’abigaragambya byahitanye abantu batatu. Kuri uyu wa gatanu hari haramutse agahenge ariko biteganijwe ko imyigaragambyo iri bukomeze.
Umuyobozi mukuru wa polisi muri Nijeriya, Kayode Egbetokun, yatangaje ko polisi mu gihugu hose yahawe ibikoresho byose bikenewe kandi yiteguye guhita ikora akazi ko kurinda umutekano w’abantu n’ibyabo vuba na bwangu igihe cyose bikenewe.
Batewe akanyabugabo n’imyigaragambyo yabaye muri Kenya, Abanyanijeriya bateguye imyigaragambyo bifashishije murandasi n’imbuga mpuzambaga, bayiha izina rya "#EndBadGovernanceInNigeria", bivuga ngo rangiza ubutegetsi bubi muri Nijeriya. Bavuze ko iyi myigaragambyo izamara iminsi 10 idahagarara.
Abigaragambya barakajwe na gahunda y’ivugururabukungu ya perezida Perezida Bola Tinubu yatumye ifaranga rikoreshwa muri Nijeriya, bita Naira, ritakaza agaciro n’ubuzima burushaho gukomerera abaturage baho. Tinubu avuga ko n’ubwo yumva ko iri vugurura ryateye ubuzima bugoye mu baturage, ari yo nzira yonyine yo kugeza Nijeriya ku iterambere mu bukungu.
Leta ya Kano yiganjemo abayisilamu, kandi imwe mu zituwe cyane kurusha izindi mu gihugu, yatangaje umukwabu amasaha 24 nyuma y’uko abigaragambya basahuye iduka n’igorofa rikorerwamo na leta. Izindi leta eshatu zashyizeho umukwabo.
