Mw’ijoro ryakeye, perezida wa Leta zunze ubumwe z’Amerika, Joe Biden, yagiranye ikiganiro n’abanyamakuru. Kibanze ku kibazo cyo kuva cyangwa kuguma mw’irushanwa ry’amatora y’umukuru w’igihugu. Avuga ko azakomeza.
Ubusanzwe, Biden ntakunda bene ibi biganiro. Ariko kubera igitutu kimuri hejuru, yashatse guhumuriza abarimo bamukuraho icyizere cy’uko atagifite intege mu mubiri no mu bwonko zo guhangana no gutsinda amatora yo mu kwezi kwa 11 gutaha. Aba barimo abo mw’ishyaka rye ry’Abademokarate b’ingeli zose, n’abaterankunga baryo. Biden yanze gutezuka.
Yagize ati: “Jyewe ndahamya ko ari jyewe wujuje byose kugirango niyamamarize kuba perezida. Narabikoze rimwe. Na none mbirimo. Urugendo ruracyari rurerure muri iri rushanwa. Ngomba gukomeza ntahagarara. Kubera iki? Kubera ko tugifite byinshi byo gukora, haracyari akazi kenshi ko kurangiza.”
Iki kiganiro nticyamaze impungenge abazifite. Urugero mbere y’ikiganiro yavangavanze amazina. Yitiranyije abakuru b’ibihugu bya Ukraine n’Uburusiya, ati: “Perezida Putin” aho kuvuga “Perezida Zelenskyy.”
Umunyamakuru umwe yamubajije kuri Visi-Perezida Kamala Harris. Mu gusubiza, ati: “Sinari guhitamo “Visi-Perezida Trump” ntizeye ko yansimbura ku mwanya w’umukuru w’igihugu biramutse bibaye ngombwa.”
Hashize iminota mike ikiganiro kikirangira, Depite Jim Himes w’Umudemokarate yahise asohora itangazo risaba Biden kwikura mu matora. Ni umwe kugeza ubu mu Bademokarate 17 bo mu nteko ishinga amategeko yo ku rwego rw’igihugu bamaze kubikora ku mugaragaro.
Nyamara rero, mu rwego rusange rw’igihugu, televiziyo ebyiri NBC na PBS zatangaje uyu munsi ibipimo zimaze gukorana muri rubanda, byerekana ko amatora abaye ubu Biden yatsinda n’amajwi 50%. Naho uwo bahanganye wo mw’ishyaka ry’Abarepubulikani, Donald Trump, yabona 48%. (VOA, Reuters, AP)