Umuryango w’abibumbye uratangaza ko uhangayikishijwe n’ishimutwa ry’impirimbanyi ya politike muri Libiya. ONU irasaba ubutegetsi gukora ibishoboka byose iyo mpirimbanyi ikarindirwa umutekano, akanarekurwa bidatinze.
Al-Moatassim Al-Areebi yashimuswe n’agatsiko k’abantu bitwaje intwaro kataramenyekana mu gace ka Misrata kari mu bilometero 190 uvuye mu murwa mukuru Tripoli.
Itangazo ryasohowe n’ibiro bya ONU muri Libiya rivuga ko rihangayikishijwe n’ibikorwa byo gutwara abantu bunyago mu gace ka Misrata.
Muri iki gihe Libiya ivugwamo ibibazo by’umutekano muke, ibikorwa byo gushimuta abantu no ku batwara bunyago byariyongereye.
Mu kwezi kwa Gatanu umudepite yashimutiwe mu mujyi wa Benghazi. ONU yasabye inzego z’umutekano muri Libiya gukora iperereza ryihuse zikamenya irengero rya Al-Areebi, byaba ngombwa agahita arekurwa.
Biravugwa ko Areebi yari yashimutanywe n’undi muntu waje kurekurwa amaze gukubitwa cyane. ONU irasaba kandi ko abantu bose bafunzwe binyuranije n’amategeko bahita barekurwa.
Ivuga ko abantu hafi 60 bafunze bazira ibitekerezo byabo bya politike.
Volker Turk uyobora komisiyo ya ONU ishinzwe uburenganzira bwa muntu aherutse gutangaza ko ibikorwa byo kwibasira abatavuga rumwe n’ubutegetsi muri Libiya byiyongereye bikabije muri iki gihe.