Muri Nijeriya umukuru w’ishami rishinzwe kwita ku baturage mu bihe bidasanzwe yatangaje ko muri leta ya Borno abiyahuzi b’abagore biturikirijeho ibisasu bihitana abantu 18 abandi 30 barakomereka.
Bwana Barkindo Saidu uyobora ishami rishinzwe kwita ku baturage mu bihe bidasanzwe muri leta ya Borno yavuze ko aba biyahuzi bagabye ibitero icyarimwe ahantu hatatu hanyuranye mu mujyi wa Gwoza. Aho harimo aho bari batashye ubukwe, aho bari bagiye gushyingura no mu bitaro.
Uyu muyobozi yasobanuye ko abantu 18 baguye muri ibyo bitero barimo abana n’abagore batwite. Kugeza ubu ntawe urigamba icyo gitero. Polisi yo muri Leta ya Borno ntiyahise iboneka ngo igire icyo ivuga kuri ibi bitero. Umutwe wa Boko Haram n’ishami ryawo Islamic State West Africa Province, (ISWAP), ni byo byiganje muri iyi leta.
Leta ya Borno imaze imyaka yarabaye isibaniro ry’imvururu z’abarwanyi ba kiyisilamu zahitanye ababarirwa mu bihumbi zikura mu byabo ababarirwa muri za miliyoni. N’ubwo ingabo za Nijeriya zashegeshe imitwe y’aba barwanyi, baracyisuganya bakagaba ibitero bitunguranye kandi bikomeye ku basivili n’abasirikare