Muri Moritaniya, Perezida Mohamed Ould Ghazouani yatsindiye manda ya kabiri ku mwanya w’umukuru w’igihugu nyuma y’amatora yabaye ejobundi ku wa gatandatu.
Nk’uko perezida wa CENI, Komisiyo y’igihugu y’amatora, Dah Ould Abdel Jelil, yabitangaje kuri uyu wa mbere, Ghazouani afite amajwi 56.12%. Bityo, icyiciro cya kabiri ntikizabaho. Cyari kuba iyo hatagira umukandida ubona ubwiganze busesuye.
Mohamed Ould Ghazouani afite imyaka 67 y’amavuko. Ni Jenerali wavuye ku rugerero. Yigeze kuba umugaba mukuru na minisitiri w’ingabo za Moritaniya. Muri iki gihe, ni na perezida w’Umuryango w’Ubumwe bw’Afrika.
Afite manda y’imyaka itanu. Yasezeranyije abaturage ba Moritaniya, miliyoni eshanu, ko azihatira kuzamura imibereho yabo, mu gihe icyo gihugu kitegura gutangira gucukura umwuka kimeza, gaze, mu mpera z’uyu mwaka.
Ghazouani atsinze abandi bakandida batandatu, barimo umugwa mu ntege witwa Biram Dah Abeid. Yabonye 22.10%. Avuga ko atazemera intsinzi ya Ghazouani, arega ko agenzura Komisiyo y’amatora. Ababyeyi ba Abeid bari abacakara. Byamuteye kwiyegurira kurwanya ubucakara. Ni ubwa gatatu yimamarije umwanya w’umukuru w’igihugu.(AFP, Reuters)