Ikiganiro-mpaka cya mbere kizaba ejo ku wa kane hagati y’abakandida b’amashyaka abiri ya mbere akomeye, Joe Biden w’Abademokarate na Donald Trump w’Abarepubulikani.
Iki kiganiro cyateguwe kandi kizakoreshwa na televiziyo CNN, imwe mu zikomeye mu gihugu, muri “studios” zayo mu mujyi wa Atlanta, umurwa mukuru wa leta ya Georgia, mu majyepfo y’uburasirazuba bw’igihugu.
Biden na Trump bakigiyemo bamaze iminsi biyamamaza umwe avuga ko gutora undi ryaba ari ibara rigwiriye Leta zunze ubumwe z’Amerika n’isi. Trump yemeza ko Biden arimo asenya igihugu.
Agira ati: " Ibiciro biriyongera bikabije. Ubwicanyi bwarananiranye. Ubulayi ni akajagari. Uburasirazuba bwo hagati burimo buraturika. Irani irimo irishyiramo akanyabugabo. Ubushinwa burimo burazamuka. Ikindi, iri shyano ry’umuperezida arimo aratujyana mu ntambara ya gatatu y’isi yose."
Naho Biden arega Trumps ngo azasubiza igihugu inyuma. Yagize ati:" Intambwe zose twateye tujya imbere, ubwigenge n’ubwisanzure byose, amahirwe yose birugarijwe. Trump arimo aragerageza kwibagiza igihugu uko cyari kimeze akiri perezida. Nyamara ntituzibagirwa."
Ibipimo bikorwa muri rubanda byerekana ko kugeza ubu Biden na Trump begeranye cyane mu majwi, ku buryo abaturage bategereje iki kiganiro-mpaka n’amashyushyu menshi, nk’uko Prof Alan Schroeder abisobanura.Yigisha iby’itangazamakuru muri kaminuza yitwa Northeastern University yo mu mujyi wa Boston, umurwa mukuru wa leta ya Massachusetts, mu burasirazuba bw’igihugu.
Aragira ati:" Ndatekereza ko ikiganiro gishyira igututu kingana ku bakandida bombi, bombi kubera amahirwe, ariko kandi n’ibyago, bashobora kugikuramo"
Iki kiganiro-mpaka gifite umwihariko kuko kirimo umukuru w’igihugu n’uwari umukuru w’igihugu. Abaturage barabazi bombi. Bombi ni abasaza bakuze. Biden afite imyaka 81. Naho Trump afite 78. Rubanda bibaza niba bafite ubwonko bugikora neza ku buryo bashobora kuyobora igihugu neza.
Iki kiganiro-mpaka ni icya mbere mu mateka kibaye mbere y’uko abakandida bombi bimikwa ku mugaragaro n’amashyaka yabo. Abarepubulikani bazakoranya intumwa zabo mu nama kaminuza, bita “Convention” mu Cyongereza, izimika Trump ku mugaragaro kuva kw’itariki ya 15 kugera kuri 18 z’ukwa karindwi mu mujyi wa Milwaukee muri leta ya Wisconsin.
Iy’Abademokarate izimika Biden ku mugaragaro izaba kuva kuri 19 kugera kuri 22 mu kwa munani mu mujyi wa Chicago muri leta ya Illinois.