Ishirahamwe ry’abamenyeshamakuru batagira imbibe, Reporters sans frontiers (RSF), ryasubiye kwitwarira Isirayeri muri sentare mpuzamakungu mpanavyaha, CPI.
Mw’itangazo iryo shirahamwe ryasohoye, ryavuze ko Isirayeri yakoze ivyaha vy’intambara ku bamenyeshamakuru.
RSF risaba umushikirizamanza mukuru wa CPI kugurura amatohoza ku bamenyeshamakuru icenda bo muri Palestina iryo shirahamwe ryemeza ko bagandaguwe n’ingabo za Isirayeri hagati y’itariki ya 15 z’ukwezi kwa 12 ko mu 2023 n’itariki 20 z’uku kwezi kwa Gatanu.
Aba icenda, baje biyongera ku bandi barenga 90, RSF yari yaramaze gushira mu birego vy’ibanze yarungikiye CPI mu mwaka uheze.
RSF rivuga ko rifise ivyemezo vy’uko benshi mu bamenyeshamakuru bagera ku 100 isabira ubutungane, bishwe bigambiriwe.
Mu birego RSF yarungikiye CPI, harimwo ibijanye n’iyicwa ry’abameshamakuru Hamza Dahdouh na Moustafa Thuraya bakorera tereviziyo ya Qatar, Al Jazeera..
Abasigwa b'Umumenyeshamakuru, Hamza Dahdouh
Aba bamenyeshamakuru babiri (Hamza Dahdouh na Moustafa Thuraya), baguye mu gitero cagabwe ku modoka yabo. Bakigandagurwa, igisirikiare ca Isirayeri cabagirije “kubangamira umutekano no gukoresha utudege tw’intambara tutagira umudereva hamwe n’ugukorana n’intagondwa z’abarwanyi.” Umukoresha wabo n’imiryango yabo yateye utwatsi ivyo vyagiriji.
Bubaye ubwa gatatu RSF yitwariye Isirayeri muri CPI. Dosiye ya mbere RSF yarungikye CPI yayirungitse mu kwa 10 ko mu mwaka uheze, iya kabiri iyirungika mu kwa 12.
Ku bwa RSF, muri rusangi kuva intambara ya Isirayeri na Hamas yaduka, ingabo za Isirayeri zimaze kugandagura n’imiburiburi abamenyeshamakuru bo muri Gaza 100.
CPI ntaco iratangaza ku birego bishasha vya RSF. Gusa, mu ntango z’uno mwaka, Umushikirizamanza mukuru wa CPI, Karim Khan, yavuze ko mu matohoza yariko arakora ico gihe, harimwo n’ayajanye n’abamenyeshamakuru biciwe mu ntambara ya Hamas na Isireyri.
Karim Kahn aheruka gusaba ko bamwe mu bategetsi bakuru ba Isirayeri barimwo umushikiranganji wa mbere n’abategetsi ba Hamas basohorerwa imitahe.